Nga Shkodra, kreu demokrat Basha hodhi tezën e “zgjidhjes së krizës nga brenda”, duke u dhënë kështu një goditje ndërkombëtarëve në përpjekjet për të diktuar formula zgjidhjeje për atë çfarë ndodh prej muajsh në politikën e Tiranës, ku opozita ka dalë tërësisht jashtë sistemit.
“Ska zgjidhje nga jashtë. Zgjidhja do të vijë nga brenda. Jashtë kemi pasur miq, por kjo krizë nuk zgjidhet duke bërë viktimë apo duke parë nga qielli. Zgjidhet duke marrë në dorë fatet tona”, tha Basha më tej.
Duke u endur te teza kredoja tjetër, ajo e “ndarjes së politikës nga krimi”, Basha nuk e qartësoi më tej se si do vinte zgjidhja nga brenda, duke e detajuar atë në akte politike.
“Kriza është prodhuar nga bashkëpunimi i politikës me krimin dhe ajo mund të zgjidhet duke e ndarë atë nga krimi. Proces zgjedhor pa garancinë se qytetarët nuk do të dhunohen, pa një transformim të thellë, nuk mund të ketë. Do të vazhdojmë betejën deri në fund për të çliruar Shqipërinë nga politika e lidhur me krimin. Ky është qëllim që bashkon gjithë shqiptarët e ndershëm”, tha Basha. /tesheshi.com/
