Disa ditë pasi kishte deklaruar se është gati të votojë ligjin e Vettingut, Partia Demokratike nxjerr një tjetër pretekst për të mos e arritur një gjë të tillë. Kreu i opozitës, Lulzim Basha ka ngritur një problem të ri, pasi sipas tij, ligji dhe Kushtetuta e re janë përkthyer gabim. Në këto kushte, Basha tha se është kërkuar sërish që të përsëritet kërkesa ndaj Komisionit të Venecias, përmes Gjykatës Kushtetuese.
“Kemi informuar Gjykatën Kushtetuese dhe Parlamentin se përkthimi i Kushtetutës së re dhe Vettingut ka gabime të mëdha. I kemi kërkuar Gjykatës Kushtetuese të ripërsërisë kërkesën ndaj Komisionit të Venecias. Do informojmë zyrtarisht edhe Komisionin e Venecias për këtë problem”, është shprehur Basha gjatë mbledhjes me grupin e Partisë Demokratike.
Vettingut është momentalisht i pezulluar dhe është dërguar për opinion në Komisionin e Venecias nga Gjykata Kushtetuese, pas ankimit të Partisë Demokratike dhe Unionit të Gjyqtarëve.
Përgjigja pritej të vinte në mesin e muajit dhjetor, por me një ankesë të dytë dukshëm do n’a duhet të presim pak më gjatë.
Ligji për Vettingun ka si qëllim rivlerësimin e pasurive të gjyqtarëve dhe prokurorëve, ndërsa është cilësuar si një nga pikat më themelore për çeljen e negociatave për anëtarësimin e Shqipërisë në Bashkimin Evropian.
Ndërkohë, pas përfundimit të mbledhjes me grupin parlamentar, Basha foli për gazetarët. Ai ka shprehur pakënaqësinë sa i përket projekt-buxhetit të 2017-ës, pasi sipas tij janë parashikuar rritja e taksave.
“Së pari, është buxheti që i merr shumicës dhe i jep pakicës. Do të rriten prapë taksat. 10 milion dollarë më shumë ka parashikuar t’u marrë shqiptarëve duke e çuar rritjen totale të taksave kumulative gjatë qeverisjes Rama, me 430 milion dollarë në vit. Pra Edi Rama që 3 vite më parë erdhi në pushtet me premtimin se 97% e shqiptarëve do të paguanin më pak taksa, u mori shqiptarëve këto 3 vite në total 1.5 miliard dollarë më shumë, duke u rritur taksat, jo duke përmirësuar mbledhjen e tyre, por duke u rritur taksat. Ka rritur taksën e gazit përshembull. Pse e ka rritur? E ka rritur për t’i shërbyer interesit publik? Jo. E ka rritur se ndërkohë që qytetarët konvertojnë makinat e tyre nga nafta apo benzina në gaz sepse gazi është më i lirë, ky do të mbrojë klientët e tij, duke i detyruar qytetarët të blejnë naftë ose gaz, ose t’ua paguajnë këto para Edi Ramës. Kjo është një masë që nuk ndihmon shoqërinë, nuk e ndihmon interesin publik, nuk i ndihmon qytetarët, por ndihmon një grusht klientësh të Edi Ramës në sektorin e hidrokarbureve dhe ndonjë ministër që është ortak me ta. Mora këtë shembull, por në fakt e gjithë rritja e taksave bëhet për të rënduar edhe më shumë xhepat e qytetarëve, pa iu kthyer asgjë mbrapsht, sepse po të shohim shpenzimet, edhe këtë vit 80 milion dollarë më shumë ia ka dhënë vetes së tij për shpenzime operative dhe për shpenzime të tjera të qeverisë ”, u shpreh lideri i Partisë Demokratike./tesheshi.com/
