Në një takim me struktura të Kamzës dhe Paskuqanit, kreu i PD-së, Lulzim Basha bëri thirrje për bashkim, siç e artikulon tashmë prej ditësh, kundër së keqes, që sipas tij është Rama dhe pushteti i tij.
“Në qoftë se Edi Rama ka paudhësinë të bashkojë kriminelët më në zë rreth tavolinës së tij, atëherë si mund të kemi ne skrupuj të bashkojmë në një aleancë sa më të madhe këdo që refuzon krimin, këdo që refuzon inkriminim, këdo që refuzon drogën, këdo që refuzon shit-blerjen e votës dhe asgjësimin e procesit politik, asgjësimin e zgjedhjeve të lira dhe të ndershme”, tha Basha.
Më pas, ai bëri apel që vota të konsiderohet e shtrenjtë nga çdo qytetar, pikërisht ajo që sipas tij mund ta rrëzojë Ramën.
“Për pushtet këta janë gati të bëjnë çdo gjë, ta varfërojnë popullin që të qeverisin më kollaj, t’i fusin edhe drogën mbi shpinë edhe krimin mbi shpinë. Detyra jonë është që ai i varfëri, ai i dezoluari, i pashpresi, i zhveshuri nga çdo e ardhur, nga çdo shpresë ta kuptojë se me ne vota e tij, vota e saj ka forcë dhe se kjo forcë nuk është thjesht dhe vetëm që të bëjë Lulzim Bashën kryeministër, por që atij dhe asaj t’i kthejë të drejtat që ka sipas Kushtetutës në këtë vend; të drejtën për ndihmë ekonomike kur s’ka mundësi; të drejtën për rimbursim të ilaçeve kur kjo i takon”, deklaroi kreu demokrat.
Më tej ai promovoi tezën e ardhjes së “qytetarit në pushtet”:
“Si do ta sjellim qytetarin në pushtet?! Duke kufizuar pushtetin, duke fuqizuar zgjedhësin. Ne duhet të mësohemi me votën si instrument në vendimmarrje. Vota e lirë është garancia për të nesërmen”, theksoi Basha. /tesheshi.com/
