Kreu i Partisë Demokratike, Lulzim Basha, në janë postim të tijin në rrjetin social Facebook ka bërë ditën e sotme atë që vetë e ka cilësuar si ‘bilanci 2015 i kokoshit të Surrelit’
Sipas Bashës, Rama rriti çmimin e energjisë, nafta më e shtrenjta në rajon, rriti taksat, rriti borxhin publik, uli konsumin, uli kreditimin, uli eksportin dhe importin, uli pagat dhe nuk rriti pensionet, asnjë investim i ri publik, shpunësoi 73 mijë kryefamiljarë vetëm në shtator-tetor, vodhi 400 milionë dollarë në dogana e tatime, 780 milionë euro prokurime të drejtpërdrejta për tarafin dhe familjarët e tij e të ministrave, dha hekurudha, troje dhe 340 milionë euro koncesione për oligarkët dhe ortakët e tij.
“Largoi 100 mijë shqiptarë nga vendi, 200 mijë të tjerë bënë gati letrat, uli ndihmën ekonomike, shëndetësia në kolaps, privatizoi arsimin e lartë publik, kandidoi Bushë, Roshët dhe kriminelë të tjerë për kryebashkiakë, emëroi ministrin e brendshëm ambasador të krimit të organizuar në qeveri, ndaloi me ligj hetimin e vjedhjes së shekullit, pagoi me tendera të drejtpërdrejtë nga paratë e gjakut të shqiptarëve ndërtuesit e vilave të tij në Surrel, Dardhë e Durrës, vodhi dhe shkatërroi zgjedhjet lokale”,- shkruan Basha.
Ai shton më tej se Rama u shpall nga OSBE kryeministri më i pasur me 200 milionë euro pasuri off shore, hapi 5 ekspozita me piktura në 3 kontinente (duke i nxjerrë e futur pikturat kontrabandë), arrestoi e burgosi berberë, fermerë, gra me fëmijë 4 vjeçarë për kuponin.
Kreu i PD-së, në bilancin e vitit 2015 të ‘kokoshit të Surrelit” shton se liroi Prengën, Ndokën, dhe Ndreun duke i bërë shantazh drejtësisë, fshehu kërkesën për ekstradim të Mark Frrokut, urdhëroi arratisjen e Arben Frrokut, dekoroi xhelatët e diktaturës, bëri ligjin për të burgosur gazetarët dhe opozitën, refuzoi testin e drogës./tesheshi.com/
