Kreu demokrat Basha premtoi se nuk do ketë dhunë më 30 qershor, ditën e zgjedhjeve. Në një deklaratë për shtyp, të fundit në prag të së dielës ku me bekim ndërkombëtar do shkohet në zgjedhje lokale, por dhe paralajmërim njëkohësisht se kush do i pengojë ato do të ndëshkohet, Basha tha se atë ditë nuk do preken asnjë fije floku.
Reagimi i tij vjen pak orë pas nga Uashingtoni u paralajmëruar për futje në “listën e zezë” të PD e LSI, nëse nxisin pengimit e votimit.
“Pasnesër është 30 qershori, kur Edi Rama do të kryejë aktin e fundit politik të regjimit të tij para rrëzimit.
Një gjë sot është e qartë: 30 qershori është rrëzuar pa ardhur ende. Votimet farsë janë bërë pa ardhur ende. Por 30 qershori, nga një garë politike ku do të kërkonte fitore, është kthyer tashmë në varrezën politike të Edi Ramës.
Ka vetëm një mënyrë që ne mund t’i japim oksigjen kësaj kufome politike: kjo është dhuna.
Edi Rama po kërkon viktima, që t’i përdorë ato për të justifikuar apo mbajtur pushtetin. Por ne nuk duhet të lejojmë që asnjë fije floku i asnjë shqiptari të preket për të zgjatur jetën e kësaj kufome politike”, tha Basha.
Nga ana tjetër, Basha denoncoi faktin se shoqëria shqiptare sipas tij nuk ka aftësi të reagojë ndaj së keqes.
“Mungesa e reflektimit ka qenë një mallkim shoqëror për ne si shoqëri. Ne, rrallë, kemi reflektuar pas të këqijave, prandaj i kemi përsëritur ato.
Historia politike e Edi Ramës nuk është thjesht historia e një njeriu të dështuar në çdo gjë që provoi në jetë në art, në sport, në shoqëri, që pastaj kërkon verbërisht pushtet dhe para për t’u hakmarrë ndaj botës.
Është edhe historia e një shoqërie që mashtrohet dhe nuk e dallon lehtë fytyrën e urrejtjes, fytyrën e mashtrimit. E shoqërisë që i beson fasadës, që i beson dukjes, që gënjehet nga propaganda dhe në këtë mashtrim kolektiv, i dorëzon të keqes fatet e veta”, tha Basha. /tesheshi.com/
