Një ditë para protestës së paralajmëruar të opozitës, qytetarët kanë marrë dy apele të ndryshme, një nga Lulzim Basha dhe tjetri nga policia e Shtetit. Kreu i Opozitës u kërkoi qytetarëve të bllokojnë rrugët për një orë në kryeqytet, në shenjë simbolike si do të bëhet edhe bllokimi i drogës së shpejti. Por, drejtori i Sigurisë në policinë e Shtetit, Altin Qato në një dalje për mediat, menjëherë pas Bashës u kërkoi qytetarëve të mos marrin pjesë në tubime të paligjshme.
“Policia nuk do të tolerojë aspak këdo që me veprimet e tij shkel ligjin në lidhje me tubimet e manifestimet. Policia e shtetit u bën thirrje qytetarëve të mos bien pre e thirrjeve që synojnë kaos, destabilizim, ashtu sikundër u bën thirrje të mos i bashkohen manifestimeve të paligjshme që cënojnë lirinë qytetarëve të tjerë dhe të drejtën e tyre për qarkullim të lirshëm. Të gjithë ata që do të marrin përsipër tu shkojnë pas politikanëve të kujdo subjekti politik për të cënuar rendin publik, penguar qarkullimin e lirë të njerëzve dhe mallrave, dëmtuar bashkëjetesën e qytetarëve dhe ekonominë e bizneseve do të përballen me ligjin.Policia e Shtetit do të regjistrojë çdo shtetas dhe automjet që vihet në dispozicion të një manifestimi të tillë dhe bashkë me provat përkatëse do t’ia paraqesë organit të prokurorisë me kallëzimet penale përkatëse”, deklaroi Qato.
Ai madje, u ka kujtuar qytetarëve se ligji parashikon dënime deri në burgim për pjesmarrësit në tubime të paligjshme. Ai tha se protesta e opozitës cënon rendin dhe sigurinë, duke paralajmëruar organizatorët se do mbajnë përgjegjësi për pasojat. /tesheshi.com/
