Kryetari i PD-së, Lulzim Basha. i ka drejtuar një apel ndërkombëtarëve që të flasin me emra konkretë mbi kokat e krimit apo familjet mafioze në Shqipëri. Deklarata e Bashës në këtë drejtim duket se ka lidhje me denoncimet e ambasadorit amerikan në Tiranë, Donald Lu, i cili para disa ditësh foli për klane dhe familje mafioze që drejtojnë krimin në vend.
Një ditë pas seancës parlamentare ku një nga debatet ishte edhe ai mbi lidhjet e politikës me krimin, Basha ripërsëriti akuzat se bandat kriminale në vendin tonë kanë mbështetje politike.
“Ne kemi kërkuar ndërgjegjësim nga faktori ndërkombëtar. Deri më tani ata e kanë shprehur këtë, por ka ardhur koha që të flasim me emra, të tregojmë politikanët e lidhur me krimin.
Ne nuk disponojmë fakte unike, por janë fakte publikisht të njohura. Nuk ka nevojë prokuroria dhe policia t’i çojmë ne faktet. Ata duhet të nisin hetimet kryesisht, siç e kanë për detyrë.
Goditja e krimit bëhet duke goditur drejtuesit politikë. Vetingu është fillesa e kësaj luftë të gjatë, në luftën ndaj krimit. Krimi ka mbështetje të drejtpërdrejtë nga shteti. Tashmë flitet për mafia, për një shkallë më të lartë të grupeve kriminale. PD ka denoncuar me emra klanet kriminale.
Vendi sundohet nga një kupolë politiko-kriminale. Ata që duhet të jenë në burg, janë përkrah Edi Ramës. Rama ka bërë pakt me krimin, nuk e lufton dot. Qeveria është marrë peng nga krimi i organizuar. Duhet të pastrohet politika nga krimi i organizuar, ndaj qëllimi ynë është dekriminalizimi”, tha Basha. /tesheshi.com/
