Kreu i partisë Demokratike, prej sot ish-kryebashkiaku i Tiranës, Lulzim Basha anatemoi në një konferencë të posacme shtypi pothuajse gjithcka tha kryeministri Rama në një tjetër konferencë pak orë më herët.
Sipas Bashës, mburrjet e Edi Ramës janë të pakuptueshme në dritën e ikjeve masive të shqiptarëve dhe kërcënimeve nga Europa për kthim të vizave.
“Çfarë bilanci është ky?! Në cilën fantazi të kryeministrit paska 104 mijë vende të reja pune, ku çdo ditë shqiptarët e shohin që po shkurtohen vendet e punës”, tha Basha.
Basha tha se ka rënie të investimeve të huaja ndërsa në shëndetësi, sipas tij, situata është pak të thuhet skandaloze.
“Zor se gjen sot një kryeministër që të sajojë me kaq dhunë një bilanc. Sot do të kishte qenë e udhës që Edi Rama të fliste për ndryshim kursi”, tha Basha.
Sa i takon dekriminalizimit, Basha u ndal tek raporti i DASH per trafikimin, dhe te deklarata e Ramës për deputetin që përmendet aty.
“Për të dënimi i Ndokës për prostitucion është një ngatërresë, Bushi është sajesë e medias së huaj, Elvis Roshi në zvicër është çështje emrash. Rama e di fare mirë kë ka ulur në sofrën e pushtetit, ndaj ka penguar dhe pengon, gënjyer dhe gënjen SHBA duke rrezikuar marrëdhëniet strategjike, sepse për të më strategjikë janë marrëdhëniet me kriminelët”, tha Basha. /tesheshi.com/
