Kreu demokrat Lulzim Basha ka pohuar për herë të parë se ka qenë i detyruar për të pranuar paktin me Edi Ramën për shkak të presionit amerikan.
Basha tha se në një kohë kur Europa kishte folur dhe kishte mbështetur zgjedhje pa opozitën, erdhi mesazhi amerikan që ishte i prerë dhe që mund të çonte në një izolim ndërkombëtar për PD.
“Edi Rama kishte një afat për propozimin amerikan, sikundër unë duhej të pranoja paketën McAllister+ të propozuar nga SHBA. Në të kundërt gjërat mund të ndërlikoheshin shumë më negativisht dhe PD mund të shkonte në një izolim ndërkombëtar”, pohoi Basha i ftuar në emisionin “Opinion”.
Referuar marrëveshjes, të cilën Berisha, e cilësoi të shkëlqyer, Basha tha se për mua ajo erdhi në kushtet e një detyrimi absolut.
Ndërkohë referuar deklarimeve të bëra njëditë më parë nga Berisha, kreu demokrat tha se unë këshillohem me Berishën, po vendimet dhe peshën për vendimet i mbaj unë përsipër.
“Pa dyshim që ai ka një rëndësi të madhe si themelues i Partisë Demokratike. Por në fund jam unë që marr peshën e vendimeve që i takojnë kryetarit të Partisë Demokratike. Të paktën pas ditës së djeshme kjo pyetje ka marrë një përgjigje definitive”, shpreh Basha.
Në vijim kreu demokrat tha se do të duatrokiste Ramën, edhe në sallën e Kuvendit, nëse ai do t´i qëndronte realisht deklaratave për të larguar nga zyrat e shtetit të korruptuarit.
“Mblodhi drejtuesit e hipotekave dhe u kërkoi largimin, mirë e bëri, të korruptuar janë, qen bir qenash. Por çfarë ndodhi? Kreun e hipotekës së Durrësit e morri dhe e bëri deputet, atëherë si mund të besohet Edi Rama”, tha Basha.
Një mesazh kreu demokrat e kishte edhe për kundërshtarët apo kritikët e tij në PD.
“Vija e kuqe është PD, nëse dikush cënon interesin e kësaj partie, atëherë unë jam i prerë. Por asgjë nuk varet nga humori im apo i atyre, ndaj i them punoni për PD dhe do të jetë anëtarësia dhe militantët e kësaj partie që do ju vlerësojnë”, tha Basha. /tesheshi.com/
