Kreu demokat Basha, ka parathënë shifrën e 120 mijë pjesëmarrësve në protestën e pritshme të 27 janarit në Tiranë.
“Çfarë do t’i bëjnë 12 mijë shkodranë, 120 mijë shqiptarë të bashkuar në sheshin e protestës më 27 janar? Do t’i thonë se koha jote ka marrë fund”, tha Basha nga Shkodra, në vijim të turit të tij përgatitor për protestës.
Më tej, Basha ofroi realitete të Shqipërisë nën qeverisjen e Ramës, që sipas tij përbëjnë të vërtetën e trishtueshme për vendin.
“E vërteta është ai prindi në Laprakë që kishte shitur gjakun e trupit të tij për të ushqyer dy djemtë. E vërteta janë qindra, mijëra pensionistë që pasi paguajnë faturën e kripur të dritave dhe të ujit, nuk u ngelen lekë për ilaçe. E vërteta janë qindra, mijëra të rinj të talentuar, të zgjuar, që nuk studiojnë dot, sepse prindërit nuk paguajnë dot tarifat e dyfishuara”, tha Basha. /tesheshi.com/
