Kryeministri Rama e ka quajtur si “maskaradë” atë që po ndodh së fundi në disa fakultete, e ku veçon Juridiku, ku një grup studentësh kanë bllokuar hyrjen me karrige e tavolina, duke u ngujuar brenda si një tjetër formë e vijimit të protestës në rrugë, gjithnjë duke kërkuar “8 pikat”, e shtuar dhe pezullimin e Ligjit të Arsimit të Lartë. Për Ramën, ky është një agresion me prapavijë politike.
:U kërkoj ndjesë e mirëkuptim studentëve e prindërve, që përmes mijëra mesazhesh ankohen për pengimin e dhunshëm të mësimit. Përbuzje për politikën që fshihet pas këtij agresioni të papranueshëm ndaj Universitetit. Kjo maskaradë s’do ta devijojë dot rrugën e nisur me studentët. Universitetet kanë dorëzuar në Ministrinë e Arsimit të gjitha listat e studentëve që do të përfitojnë mbështetjen tonë financiare, sipas Vendimit të Qeverisë. Ministria e Financave ka nisur sot punën për të realizuar alokimin e fondeve në çdo universitet, student për student”, shkruan Rama.
Reagimi studentor vjen një ditë pas protesta para kryeministrisë pothuajse u tret në një grusht individësh, duke e humbur qartë masivizimin, për shkak se një pjesë studentësh iu kthyen auditoreve. Kjo bëri që Rektorati të ofrojë dhe skemën e kompensimit të orëve. Por një ditë më pas, është shfaqur një tjetër formë proteste, me barrikadim dyersh. Edhe pse policia lëshoi një mesazh paralajmërues se nuk do lejonte shkeljen e ligjit, deri më tani nuk ka ndërhyrë. /tesheshi.com/
