Institucionet paralele serbe ne veri të Mitrovicës po injorojnë deklaratat e zyrtarëve të lartë të Qeverisë së Kosovës dhe institucioneve komunale të Mitrovicës.
Deri sa këto institucione theksojnë se barrikada ‘parku i paqes’, që është vendosur në Urën kryesore mbi lumin ‘Ibër’ do të hiqet shumë shpejt, sot strukturat paralele serbe kanë filluar gjallërimin e kësaj barrikade, duke mbjellë lule dhe duke e ujitur barin i cili ka filluar të thahet.
Punët në gjelbërimin e parkut po i kryen kompania paralele komunale serbe, e cila vepron nën urdhrat e kryetarit të veriut të Mitrovicës Goran Rakiq.
Zyrtarë komunalë të jugut të Mitrovicës të kontaktuar nga portali ‘Tesheshi’, nuk kanë dashur që të prononcohen rreth kësaj çështje.
Nga ana tjetër qytetarë të Mitrovicës janë shprehur shumë të indinjuar pasi kanë pritur largimin e kësaj barrikade dhe hapjen e urës për lëvizje të lirë.
Patrulla e policisë së Kosovës që është e vendosur në mesë të urës së ‘Ibrit’, në këtë rast ka qenë vetëm spektator i thjeshtë si të gjithë kalimtarët e rastit.
Policët nuk kanë parandaluar punëtorët serbë që të kryejnë veprimet e tyre, pasi që nuk kanë pasur urdhër nga lart, ka thënë një zyrtarë i policisë në Mitrovicë.
Barrikada ‘parku i paqes’, është problem politik ndërsa që policia aty është e vendosur që të mos lejojë ndonjë incident në mes të grupeve të caktuara, ka thënë zyrtari i policisë në Mitrovicë.
Barrikada ‘parku i paqes’, është vendosur në mes të Urës së lumit ‘Ibër’ vitin e shkuar duke ndarë Mitrovicë në pjesën veriore të kontrolluar nga Serbet dhe jugun e Mitrovicës të kontrolluar nga shqiptarët.
Kjo barrikadë është vendosur me bekimin e qeverisë së Beogradit ndërsa që personalisht në ngritjen e saj ka marrë pjesë Marko Gjuriq, shefi zyrës së Qeverisë së Serbisë për Kosovën si dhe kryetar i Komunës së Mitrovicës së veriut Goran Rakiq.
Nga ana tjetër, Edita Tahiri, zv.kryeministre e Kosovës dhe udhëheqëse e delegacionit të Kosovës për bisedime me Serbinë në Bruksel ditë më parë ka deklaruar se barrikada ‘Parku i paqes’ do të largohet dhe ura do të hapet për lëvizje të lirë.
/tesheshi.com/
