Katalanasit treguan mbrëmë se janë në momentin e tyre më të mirë, e jo vetëm në kampionatin spanjoll, por edhe në Champions League. Ata ditën ta përballojnë siç duhet entuziazmin e tepërt të londinezëve të Arsenalit e të godasin në momentin e duhur.
Një ndeshje taktikisht e përsosur e Barcelonës ndaj Arsenalit në “Emirates Stadium”. Pas përballimit të furisë së parë të vendasve, lojtarët e Barçës morën frenat e lojës në dorë në fundin e pjesës së parë e në minutat e para të pjesës së dytë. Tërheqja e qëllimshme më tej i dha menjëherë frytet e veta. Hapësirat e lëna në mbrojtjen e Arsenalit i dhanë mundësi treshes së frikshme të katalanasve të krijonte një seri rastesh.
Dhe goli parë i miqve erdhi në minutën e 71-të, kur i zakonshmi Messi gjen rrjetën e “topçinjve”, duke i shënuar për herë të parë dhe portierit Petr Cech. Goli i dytë u shënua nga pika e 11-metërshit po nga Messi.
Barça fitoi 0-2, e është kështu thuajse me të dy këmbët në çerekfinale, veç në ndodhtë diçka e jashtëzakonshme në takimin e dytë në Spanjë.
Në një pjesë të mirë të kohës, dhe në Torino, në takimin Juventus – Bajern i Mynihut, qenë miqtë që
kryesuan 0-2 pas golave të Müller-it dhe Robben-it. Një gabim në mbrojtje i gjermanëve u dha mundësi torinezëve të ngushtojnë diferencën me anë të Dybala-së, për t’i barazuar më pas shifrat me golin e shënuar nga zëvendësuesi Sturaro.
Rezultati 2-2 e lë gjithçka të hapur për ndeshjen e kthimit, me një avantazh, sigurisht, për Bajernin e Mynihut. /tesheshi.com/
