Shpërthim fenomenal i Barcelonës, po aq sa është fenomenal dhe shpërthimi i Luis Suarezit. 14 gola të Barçës në dy ndeshje, tetë prej të cilëve janë shënuar nga uruguajani. Golashënuesi më i mirë i kampionatit spanjoll është tani ai, me 34 gola, tre më shumë se Ronaldo i Realit.
Një pjesë e dytë e rrufeshme në “Camp Nou” ndaj Sporting Gijonit, në prani të më tepër se 77.000 shikuesve.
Një Barcelonë e papërmbajtshme, që pjesën e parë e kishte mbyllur 1-0, me golin e Messit në minutën e 12-të. Nga pesë golat e 45 minutave të dyta, katër mbajnë firmën e Suarezit. Dy prej tyre ai i shënon me 11-metërsh, siç bën dhe Nejmar.
Megjithatë, pavarësisht fitores së thellë, katalanasit shfaqën disa prej dobësive të dala në dritë ndaj Valencias. Fitorja 6-0 nuk mund të kishte qenë e tillë nëse lojtarët e Sporting Gijonit do të ishin treguar më gjakftohtë dhe më të saktë.
Barcelona rimori sërish kreun e renditjes pas rezultatit tenistik 6-0, i dyti në radhë pas atij 0-8 ndaj Deportivos të mërkurën.
Atletiko e Madridit fitoi po ashtu, veçse me më shumë mundim, ndaj Malagës. Fitorja 1-0 i dha mundësi skuadrës së Diego Simeones të mos i ndahet Barcelonës.
Më herët Reali i Madridit pati fituar 2-3 ndaj Rajo Valekanos, në një ndeshje ku fare mirë mund të kishte humbur.
Pas kësaj jave të 35-të, Barcelona dhe Atletiko e Madridit e kryesojnë kampionatin spanjoll me nga 82 pikë. 81 të tilla ka Reali i Madridit në vend të tretë. Duhen edhe tre javë për të mësuar se cili ekip do të jetë fituesi i La Ligës për këtë sezon. /tesheshi.com/
