Real e Barcelona tashmë është zhvendosur në politikë. Parlamenti autonom i Katalonjës mori vendimin për të shpallur pavarësinë në mënyrë të njëanshme pas një votimi të fshehtë realizuar këtë të premte.
Parlamenti miratoi propozim-vendimet për “Shpalljen e Republikës Katalonjase të pavarur dhe fillimin e procesit të strukturimit”, të cilat u prezantuan nga aleanca “Junts pel Si” (Të Bashkuar për Po) në qeverinë e pakicës, si dhe partia e majtë ekstreme mbështetëse “Kandidatura e Unitetit Popullor” (CUP).
Në votimin e fshehtë për propozimet e “Junts pel Si” dhe CUP-së, 70 vota ishin pro, 10 kundër, ndërsa 2 vota rezultuan të zbrazëta. Përveç partisë “Catalunya si que es pot”, të gjitha partitë e tjera opozitare nuk morën pjesë në votim, duke e lëshuar sallën e asamblesë plenare në shenjë proteste.
Ndërkohë, teksa lëshuan sallën, deputetët e Partisë Popullore (PP) vendosën flamuj të Spanjës dhe Katalonjës në ulëset e tyre.
Nga ana tjetër, kryeministri spanjoll Rajoy tha se nuk kishte rrugë tjetër përveçse të shkarkojë Presidentin katalanas Carles Puigdemont, zëvendësin e tij dhe të gjithë ministrat rajonalë, duke aktivizuar njëherësh nenin 155 të Kushtetutës që vendos autoritetet të drejtpërdrejtë të Madridit mbi rajon.
“Masat e jashtëzakonshme janë të nevojshme sepse nuk ka zgjidhje tjetër për Katalonjën përveç rikthimit të ligjit, demokracisë dhe stabilitetit. Qeveria e atjeshme po përçan familjet e po gjymton shoqërinë. Njerëzit kanë vuajtur që tani mjaftueshëm; paqartësia e situatës ka larguar bizneset nga rajoni. Ajo që u nevojitet katalanasve nuk është mbrojtje nga imperializmi spanjoll, siç i thonë ata, por nga një minorancë që në mënyrë të patolerueshme e shpallin veten pronarë të Katalonjës”, tha Rajoy. /tesheshi.com/
