E papërmbajtshmja stuhi e katalansve, forca dhe fashitja e së cilës qe dëshmuar e përjetuar në kohën e Pep Guardiolës, është rishfaqur rishtas, duke marrë me vete gjithçka gjen përpara në kohën e Luis Enrikes.
“Bombarduesit” e Barcelonës nuk kursyen mbrëmë Romën, një prej skuadrave më të mira italiane, që në vendin e vet mëton të fitojë titullin, ndërsa në “Camp Nou” shfaqet si një ekip diletantësh.
“Avioni” i Romës u rrëzua nga gjashtë “predha”, të lëshuara prej Mesit, më të mirit lojtar që ka bota, prej një bishe të vërtetë si Luis Suarez, prej një mbrojtësi që e ka për zakon të shënojë, Pikesë, e prej Adrianos, që në minutat e luajtura me pikatore në këtë sezon nuk përton ta çojë topin në rrjetë.
Një 6-1 turpërues, diçka që vetëm Barcelona mund ta bëjë. Fitorja e së shtunës në Madrid ndaj Realit paska qenë vetëm hapja e oreksit për katalanasit, që në katër ndeshjet e fundit kanë shënuar plot 16 gola.
Një lojë brilante, që edhe pse jo përpikërisht një tiki-taka, me ato pasimet jashtëzakonisht të dendura, ka një gjeometri mahnitëse, me pasime fenomenale, që mund t’i realizojë veç një program kompjuterik.
Mesi ngjau mbrëmë jo sikur gjendej prej javësh jashtë fushash, por sikur kishte luajtur me kohë të plotë çdo tre ditë. I magjishëm në çdo top që preku, argjentinasi e shpërfaqi hapur mallin që e kishte kapluar për ta rinisur cirkun e tij në fushë.
Po kaq të magjishëm qenë dhe Nejmar e Suarez, edhe pse i pari dështoi të shënojë nga pika e 11-metërshit. E të mendosh që truri i skuadrës, Iniesta, nuk ndodhej në fushë!
Ky është futboll për t’u parë, për t’u shijuar. Barcelona mund ta fitojë ose jo aktivitetin më me prestigj në Europë, por futbollin e saj nuk e luan dot askush. Kaq mjafton për atë që kërkon të shohë vërtet futboll. Gjithçka tjetër është statistikë. Mjerë kush bie nën breshërinë e “bombarduesve” katalanas!
Përndryshe, Roma nuk e pëson për herë të parë këtë lloj humbjeje në Champions League. Dy herë të tjera është shkërmoqur me të njëjtin rezultat, 7-1. Më 10 prill të 2007-ës, në ndeshjen e dytë çerekfinale të këtij aktiviteti, Roma i dorëzohet tërësisht Mançester Junajtedit në Angli: 7-1 për këtë të fundit. Shtatë vite më vonë, më 21 tetor të 2014-ës, në ndeshjet në grupe, është një skuadër mike që shkakton tërmet në stadiumin olimpik të Romës: Bajerni i Mynihut fiton 1-7! /tesheshi.com/
