Pasi nënshkroi të martën me qendërmbrojtësin e Francës, Samuel Umtiti, Barcelona ka shtuar në radhët e veta sot dhe një tjetër lojtar francez, mbrojtësin Lucas Digne.
“Barcelona ka arritur një marrëveshje me PSG-në për të nënshkruar për pesë sezonet e ardhshme me lojtarin 22-vjeçar francez Lucas Digne,” lajmëroi klubi katalanas në faqen e vet zyrtare.
Digne luajti me Romën në sezonin e shkuar, i huazuar nga ekipi francez. Në 32 paraqitje në Serinë A, ai shënoi një gol.
Shuma fillestare e transferimit të mbrojtësit francez te Barcelona është 16.5 milionë euro.
Lucas Digne ka luajtur më herët për Lilën, për të kaluar në vitin 2013 te PSG-ja, skuadër për të cilën luajti në 44 takime.
Ai qe pjesë e përfaqësueses franceze në Euro 2016-tën, por nuk u aktivizua për asnjë moment. Digne është aktivizuar më herët në 13 ndeshje të kombëtares së Francës. /tesheshi.com/
