Barcelona ka bërë gjithçka për të marrë një trepikësh në “Camp Nou” ndaj Malagës, në një sfidë për javën e 12-të të kampionatit spanjoll, por nuk ia ka dalë dot.
Në 98 minuta lojë kanë qenë të shumta rastet, me një zotërim të plotë të topit nga vendasit, veçse në fund rezultati ka qenë ai i fillimit: 0-0.
Lionel Messi qe mungesa e madhe; në gjendje jo të mirë shëndetësore, aq sa e pati të pamundur të ishte me ekipin sot. Pezullimi e bënte gjithashtu të pamundur aktivizimin e Luis Suarez-it. Për të mos përmendur mungesën e Iniesta-s.
Pjesa e dytë qe posaçërisht nën kontrollin e plotë të Barcelonës. Diego Llorente e la Malagën me dhjetë lojtarë pasi doli me të kuqe në minutën e 68-të për një ndërhyrje të parregullt ndaj Neymar-it.
Braziliani u mundua fort të shënonte, por pa sukses. Një veteran në futbollin spanjoll, Kameni, portieri i Malagës, u kthye në hero në fundin e ndeshjes. Një mrekulli e tij qe pritja e topit të gjuajtur me kokë nga Neymar në minutën e 94-t.
Në çastet finale pati tension në fushë nga vonesat e lojtarëve të Malagës. Kameni qe përsëri vendimtar me dy ndërhyrje. Një karton tjetër i kuq, po për një lojtar të Malagës, Juan Carlos-in, në minutën e 97-të, qe kapaku i një ndeshjeje pa gola.
Barcelona nuk mundi ta kalonte përkohësisht Realin e Madridit, duke mbetur me 26 pikë në vend të dytë.
Sevilja fitoi 2-3 në mesditë ndaj Deportivo la Korunjës në transfertë. Në mbrëmje pritet të luhet derbi i Madridit, mes Atletikos dhe Realit. /tesheshi.com/
