Katalanasit ngjan ta kenë pasur ende mendjen te kualifikimi historik në Champions League në mesjavë teksa dolën në fushë në “Riazor” në përballjen ndaj Deportivo la Korunjës.
Një përballje që nuk ka shkuar siç duhet, ndërsa ka ardhur humbja e tretë për Barcelonën në 27 javë të kampionatit spanjoll.
Pa Neymar-in në fushë, ashtu si pa Iniesta-n, Barcelona ndeshi në vështirësi, duke pësuar gol fillimisht në mbarim të pjesës së parë. Joselu shënoi në minutën e 40-të; një moment gëzimi për mbështetësit e Deportivos.
Barazimi erdhi shpejt, me të nisur pjesa e dytë e lojës. Suarez rivendosi ekuilibrin në fushë, që do të prishej sërish në minutën e 74-t. Goli i Alex Bergantinos-it do t’i sillte fitoren 2-1 Deportivos.
Me një pikë më shumë se Reali, Barcelona mund ta lëshojë vendin e parë nëse madrilenët e mbyllin me sukses sfidën e mbrëmjes ndaj Real Betisit. Humbja e katalanasve është një lajm i mirë dhe për Seviljen dhe Atletikon e Madridit, në ndjekje, në vend të tretë dhe të katërt në klasifikim. /tesheshi.com/
