Tre vitet e qëndrimit të Luis Enrique-s në stolin e Barcelonës mund të marrin fund trishtueshëm nëse gjërat nuk shkojnë siç duhet prej ditës së sotme. Tre ndeshjet në vijim për katalanasit janë vendimtare për objektivat sezonalë.
Euforia e eliminimit të PSG-së në Champions League mori fund me humbjen 3-0 ndaj Juventusit në çerekfinale të aktivitetit. Përvoja, fortësia e sukseset e skuadrës së Torinos aq që kanë të krahasuar me ato të francezëve, çka e bën shumë të vështirë detyrën për katalanasit.
“Jam më pak optimist këtë herë,” deklaronte Enrique pas humbjes me Juventusin, si për të paralajmëruar një eliminim të mundshëm në ditët e para të javës së ardhshme.
Por më parë është ndeshja e kësaj mbrëmjeje ndaj Real Sociedadit, në kampionatin spanjoll, që duhet fituar medoemos.
Vetëm një trepikësh do ta mbante në lojë Barcelonën në luftën për titull në La Liga. Fitorja do të vlente shumë për mëkëmbjen e moralit, por dhe për të shpresuar ndërsa të dielën e ardhshme vjen në “Santiago Bernabeu” klasikja ndaj Realit të Madridit.
Luis Enrique nuk do të ketë mundësi të lërë lojtarë pushim këtë të shtunë, pasi mungojnë Neymar, Mascherano, Aleix Vidal e Rafinha.
Suksesi i sezonit kalon përmes këtyre tre takimeve, ndaj Sociedadit, Juventusit dhe Realit. Nëse dështohet në to, Barcelonës do t’i mbetet vetëm të luftojë në Kupën e Mbretit, ku trofeu duket më afër me Alavesin si kundërshtar në finale. /tesheshi.com/
