“Të mërkurën luajmë ndeshjen më të rëndësishme të vitit.” Të tillë e mendon Luis Enrique ndeshjen e dy ditëve më pas ndaj Atletikos së Madridit, çerekfinalen e dytë të Champions League-s.
Nga favorite e padiskutueshme, Barcelona ka ndjerë t’i lëkunden pozitat në kampionatin spanjoll dhe në aktivitetin e kampionëve të Europës.
Një makth i vërtetë i ka pushtuar katalanasit, që nuk e dinë se ç’po ngjet me ta. Askush nuk e mendonte pak javë më parë se La Liga do të rihapej sërish pas një kryesimi fenomenal të Barcelonës. E keqja nis më 20 mars, kur Barcelona barazon 2-2 me Vilarealin. Për t’u pasuar nga humbja 1-2 ndaj Realit të Madridit më 2 prill. E për t’i vënë kapakun rrëshqitjes së pakuptueshme, Barça humbet këtë të shtunë në “Anoeta” ndaj Real Sociedadit.
Edhe pse kryesuese e kampionatit, Barcelona ka tani vetëm tre pikë më shumë se Atletiko e Madridit, e katër më tepër se Reali. Tabloja plotësohet me atë çfarë e pret Barçën në fundjavë. Reali luan të shtunën në fushën e Getafes, e Atletiko pret Granadën të dielën. Katalanasit e kanë shumë më të vështirë, ndërsa kanë punë me Valencian. Edhe pse në “Camp Nou”, edhe pse Valencia është në një prej sezoneve më të dobëta të saj. Ama, është po kjo Valencia që fitoi dje 2-1 ndaj Seviljes.
Por më parë është sfida e Champions League-s të mërkurën. 2-1 e fitoi takimin e parë Barça ndaj madrilenëve të Atletikos, veçse edhe me pak fat e me ndihmën e gjyqtarit. Në “Vicente Calderon” do të jetë krejt ndryshe.
Aty do të luhet i tërë sezoni. Një eliminimin do të ishte katastrofë, ndryshe, gjithçka mund të niste aty ku puna ngeci vetëm dy apo tre javë më herët: gola, fitore dhe dominim i Barcelonës.
Ja ç’thotë Luis Enrique: “Nëse lojtarët ndjehen pesimistë, kjo nuk do ta ndihmojë ekipin tim. Ata janë lojtarë, jo makineri.”
“Nuk ka shfajësim, ka vetëm rezultate. Ka shumë arsye për të qenë optimistë, edhe nëse rezultatet nuk janë ato që duam.”
Një finale sezoni në udhëkryq për Barçën, që të mërkurën do duhet të vendosë se nga do t’ia mbajë. /tesheshi.com/
