Katalanasit janë futur në një spirale të pabesueshme humbjesh, që as ta vetë nuk janë në gjendje t’i japin shpjegim.
Një skuadër e shpërfytyruar, pa mendim, e tensionuar, në panik, çka i bën lojtarët të gabojnë edhe atëherë kur gabimi është i pamundur.
Në “Camp Nou” fitoi mbrëmë Valencia më e dobët në shumë e shumë sezone. Por rezultati 1-2 për miqtë mund të kishte qenë shumë më i thellë nëse ata do t’i kishin shfrytëzuar ato raste në njëzet minutat e fundit të lojës, kur janë gjendur dhe të vetëm para portës.
E mbrëmshmja qe e treta humbje e njëpasnjëshme e Barcelonës në kampionatin spanjoll. Katalanasit humbin 1-2 më 2 prill ndaj Realit të Madridit, dorëzohen në fushën e Real Sociedadit më 9 prill, teksa vendasit fitojnë 1-0, për t’i vënë kapakun me humbjen 1-2 më 17 prill ndaj Valencias. Barcelona nuk humbiste tre takime rresht që nga shkurti i 2003-shit, trembëdhjetë vite të shkuara.
Për t’i shtuar një barazim 2-2 më 20 mars ndaj Vilarealit. Ndërsa fitorja e fundit për Barcelonën në kampionatin spanjoll është më 12 mars, kur mposhtte 6-0 Getafen.
Rezultate katastrofike, që po t’u bashkosh dhe takimet e Champions League-s, i bie që Barcelona të ketë humbur katër prej pesë ballafaqimeve të fundit. Duke sjellë eliminimin në Europë, por edhe humbjen e epërsisë së jashtëzakonshme në pikë ndaj kuındërshtarëve në kampionatin vendas.
Ndeshja e mbrëmshme qe një prej më të shëmtuarave që ka luajtur Barcelona, posaçërisht pjesa e dytë. Edhe pse portieri i Valencias, braziliani Diego Alves, bëri një seri pritjesh vendimtare, edhe pse Shkodran Mustafi u cilësua lojtari i ndeshjes, asgjë nuk e justifikon humbjen e katalanasve.
Vendi i parë në La Liga është bërë tashmë bashkë me të dytin, ndërsa Barcelona dhe Atletiko e Madridit kanë nga 76 pikë, me Realin e Madridit që vjen nga pas me veç një pikë më pak.
Të mërkurën, në ndeshjet për javën e 34-t të kampionatit spanjoll, të tre ekipet e kreut i presin përballje sfiduese: Barcelona luan në fushën e Deportivos, Atletiko në të Bilbaos, e Reali pret Vilarealin.
“Nuk është koha për t’i kritikuar lojtarët,” thotë trajneri i katalanasve, Luis Enrique, “por për t’i inkurajuar dhe lavdëruar. Do t’i luajmë ndeshjet e mbetura me kokën lart, të gatshëm për të lënë pas një situatë të vështirë.” /tesheshi.com/
