Katalanasit janë shpallur rishtas kampionë të La Ligës, duke fituar sot pasdite 0-3 ndaj Granadës. Barcelona ka marrë frymë më në fund lirisht, duke fituar një trofe të merituar.
Skuadra e Luis Enrique-s shihej që në shkurt si kampione e padiskutueshme, por një krizë e beftë në mes të prillit, e bashkëshoqëruar me një eliminim në çerekfinalet e Champions League-s nga Atletikoja e Madridit, bëri që diferenca e thellë me kundërshtarët të mos ishte më.
Falë uruguajanit Suarez, që gjatë këtyre javëve ka shënuar gola pa mbarim, të ndihmuar sigurisht dhe
shokët e skuadrës, posaçërisht nga Neymar e Messi, Barcelona ia ka dalë të shpallet kampion!
Tre gola për Suarez-in në takimin e sotëm në Granada; një fitore veçmas e tij. Ai shpallet golashënuesi më i mirë i kampionatit spanjoll, me 40 gola, duke lënë prapa Cristiano Ronaldo-n.
Suksesi i Suarez-it bëhet më kuptimplotë nga fakti se që nga sezoni 2009-2010, golashënuesi më i mirë ka qenë o Ronaldo, o Messi.
Një tjetër uruguajan do të qe golashënuesi më i mirë në sezonin 2008-2009, Diego Forlan, sulmuesi i Atletikos së Madridit asokohe.
Barcelona mund të fitojë një tjetër trofe të dielën e ardhshme, kur do të luajë ndaj Seviljes në finalen e Kupës së Mbretit.
Ndjekësi më i afërt i Barcelonës, ekipi i Realit të Madridit, bëri detyrën në fushën e Deportivos, duke fituar 0-2. Por dy golat e Ronaldo-s u kthyen thjesht në statistikë me fitoren e Barcelonës. Reali e mbylli kampionatin në vend të dytë, një pikë pas katalanasve.
Mbretërimi i Barcelonës në futbollin spanjoll vazhdon, me të dytin kampionat radhazi të fituar. /tesheshi.com/
