Klubi blaugranas ka ndërruar strategji në lidhje me komentet për arbitrimin në kampionatin spanjoll. Katalanasit kishin zgjedhur heshtjen para kritikës sa i takon gjykimit të ndeshjeve, pavarësisht deklarimeve të trajnerëve të mëparshëm.
Në të kaluarën ishte Pep Guardiola që kishte nisur luftë me gjyqtarët spanjollë, madje duke i ofenduar.
“Clos Gomez gënjen”, ishte fraza e ish-teknikut azulgrana për njërin prej gjyqtarëve më të mirë të kampionatit spanjoll.
Pastaj ishte mbrojtësi Gerard Pique që deklaroi se arbitri Velasco Carballo nuk e kishte mendjen tek gjykimi i ndeshjes, por vetëm tek përjashtimi i tij.
Luftën nga distanca me gjyqtarët spanjollë e ka vazhduar edhe trajneri aktual, Luis Enrique, që e ka kundërshtuar disa herë gjykimin ende pa filluar ndeshja.
“Caktimi i gjyqtarit Gonzales Gonzales më ka befasuar mua dhe të gjithëve. Ky nuk është një lajm i mirë për mua dhe për lojtarët e mi,” do të thoshte mes të tjerash Enrique.
Ndërkohë, edhe vetë presidenti i klubit, Josep Maria Bartomeu, ka deklaruar se tani e tutje klubi do të bëjë një listë për të gjithë gjyqtarët e padëshiruar në “Camp Nou”, për të mos pasur të drejtë të gjykojnë ndeshje të Barcelonës. /tesheshi.com/
