Finalja e mbrëmshme e Kupës së Mbretit ka qenë pa dyshim më e lodhshmja, më e mundimshmja, për Barcelonën në vitet e fundit, që ka patur për kundërshtar Seviljen, skuadrën fituese të Ligës së Europës. Katalanasit e kanë fituar për herë të 28-të Kupën e Mbretit, në të dytin vit radhazi të shpallur fitues.
Një finale e luajtur në “Vicente Calderon”, në shtëpinë e Atletikos së Madridit. E nisur mirë për lojtarët e Barcelonës, që e marrin lojën nën kontroll deri në minutën e 36-të, kur Mascherano nxirret jashtë me të kuqe.
Epërsia në numrin e lojtarëve i jep krahë Seviljes, që nuk ngjan aspak e lodhur nga finalja e Ligës së
Europës e luajtur pak ditë më parë. Portieri Ter Stegen tregon vlera teksa e shpëton portën e Barcelonës me ndërhyrjet e tij.
Pjesa e parë do të mbyllej pa gola, ndërsa gjërat vështirësohen për katalanasit kur Suarez e lë fushën i dëmtuar në minutën e 57-të. Një Barcelonë që e ka humbur rrezikshmërinë me zhvendosjen e ngadaltë nga mbrojtja në sulm.
Sevilja bën përpjekjet e veta, por nuk ia del të shënojë ndaj një Barcelone me dhjetë lojtarë. Për të ardhur në shtesat nga 15 minuta pas barazimit të pandryshuar në lojën e rregullt.
Dhe këtu vjen momenti i Barçës. Banega ndëshkohet me të kuqe në minutën e 92-të. Barazpeshë lojtarësh në fushë. Messi tregon klasin e vet me një pasim prapa kurrizit të mbrojtësve të Seviljes, të kthyer në gol me po aq klas nga Jordi Alba. Eshtë minuta e 97-të, 1-0 për Barcelonën!
Një tjetër lojtar i Seviljes e sheh kartonin e kuq t’i tundet para syve. Carriço e lë skuadrën me nëntë lojtarë në minutën e 121-të. Menjëherë më pas vjen goli i dytë i Barcelonës. Nga një pasim po prej këmbës së Messi-t. Neymar i çon shifrat në 2-0.
Barcelona arrin të fitojë trofeun e dytë në Spanjë. Kupa e Mbretit është në duart e katalanasve! /tesheshi.com/
