Barcelona, Dortmund-i dhe PSG-ja e mbyllin sezonin me një kupë në duar

Katalanasit nuk e çuan dëm të fundit mundësi për një trofe në këtë sezon, duke fituar mbrëmjen e së shtunës Kupën e Mbretit.

Kjo qe hera e tretë radhazi që kjo kupë shkon për ta, si dhe ishte e dyta herë rresht që fitohej në “Vicente Calderon”, ashtu si sezonin e shkuar.

Lionel Messi do të ishte edhe një herë tjetër frymëzuesi i ekipit në fitoren 3-1 të Barcelona-s ndaj Alaves-it. Ai do të shënonte golin e parë, por do të ishte i përfshirë dhe në dytën e në të tretin, shënuar nga Neymar dhe Paco Alcacer.

Alaves, që në nisje të sezonit e pati mundur në “Camp Nou” Barcelona-n në La Liga, e që në fazën e dytë do të mundej thellë në fushën e vet nga e njëjta skuadër, u përgjigj në finalen e Kupës së Mbretit me vetëm një gol, po ashtu shënuar në 45 minutat e para.

Mbyllje e gëzuar dhe për Luis Enrique-n, që mbrëmë kishte ndeshjen e fundit në krye të katalanasve pas tre sezonesh.

Nëse te Barcelona qe përcaktues Messi në fitimin e kupës, në një tjetër finale, në atë të Kupës së Gjermanisë, fitorja për Borussia Dortmund-in mban firmën e shënuesit më të mirë të saj, Aubameyang.

Dortmund-i ishte një humbës i rregullt në tre finalet e fundit të DFB Pokal-it, dhe pati momente në finalen e së shtunës ndaj Eintracht Frankfurt-it kur dukej se përsëri do të ndodhte kështu.

Golit të Dembele-së në minutën e 8-të për Borussia-n iu përgjigj Rebic në minutën e 29-të. Ndeshja do të zgjidhej nga 11-metërshi i kthyer në gol nga Aubameyang në pjesën e dytë.

Fitorja 2-1 e kthen pas pesë sezonesh trofeun e kupës te Borussia e Dortmund-it.

PSG-ja, skuadra e kryeqytetit francez, mund të ketë lëshuar terren në kampionatin vendas, por ende reziston në Kupën e Francës.

Në “Stade de France” ka ardhur trofeu i 11-të për të në këtë aktivitet; një rekord në futbollin francez. Po ashtu, Kupa e Francës fitohet për të tretin vit të njëpasnjëshëm.