Ekipi katalanas nuk la vend për asnjë surprizë këtë pasdite, duke e mposhtur 5-0 Las Palmasin në “Camp Nou” dhe duke u ngjitur në vend të dytë në renditjen e La Ligës.
Barça iu shmang humbjes në sekondat e fundit javën e shkuar ndaj Vilarealit në transfertë, por këtë herë nuk kishte asnjë mëdyshje në sigurimin e një trepikëshi me vlerë në garën për kampionatin.
Paksa e habitshme ishte vetëm prania e turkut Arda Turan në formacionin e parë, me Neymar-in në stol. Rakitic po ashtu qe lënë jashtë formacionit, si shpesh në ndeshjet e fundit, për t’u futur në pjesën e dytë.
Statistikat flasin tërësisht për të zotët e shtëpisë, që e mbizotëruan lojën në 65 për qind të saj. Gjithsesi, pjesa e parë do të kishte vetëm një gol, atë të Luis Suarez-it në minutën e 14-të.
Katër golat e tjerë do të shënoheshin në pjesën e dytë. Messi, përsëri Suarez, Arda Turan dhe Aleix Vidal do të ishin realizuesit e tyre.
Te Barcelona presin të qetë tani përballjen e së dielës mes Seviljes dhe Realit të Madridit, një sfidë kyçe për renditjen e skuadrave në krye të klasifikimit. /tesheshi.com/
