Asgjë nuk duket se po shkon mirë tek Barcelona. Pavarësisht një fitoreje të vuajtur që arriti në hapje të La Ligas, katalanasit nuk po arrijnë të bëjnë goditjet e duhura për të riforcuar skuadrën.
Pas largimit të Neymar, në Spanjë po i bëjnë jehonë një çështjeje të re që ka shpërthyer tek Barça, pikërisht asaj Iniesta. 35 vjeçari ka pritur një rinovim të kontratës, por nuk ka gjetur gadishmërinë e klubit dhe ka bërë habi, për këtë indiferencë, duke kërkuar edhe shpjegime.
Mediat në Spanjë aludojnë se nuk do të ketë një rinovim sipas kushteve të mesfushorit fantazist, e mbase nuk do të ketë rinovim fare. Nga ana tjetër, katalanasit duket se po heqin dorë edhe nga një tjetër objektiv i rëndësishëm, braziliani Kutinjo.
“Muri” që ka ngritur Liverpool për të penguar marrëveshjen, e cila është e dëshiruar si nga Barcelona ashtu edhe nga vetë Kutinjo, po i pakëson shpresat e blaugranave, çka mund të bëjë që ata të kërkojnë përforcime gjetiu.
Nga ana tjetër, ka filluar të qarkullojë edhe oferta e Mançester Sitit, që është gati të blejë Messin, duke shlyer klauzolën 300 milionw euro që e lidh argjentinasin me klubin.
Me gjithë këto pikëpyetje, asgjë nuk po shkon siç duhet tek Barça, e duket sikur Neymar, “e ka patur këmbën ters”, sepse nuk po gjendet “paqe” as mes vetë lojtarëve, që kanë filluar edhe zënkat në stërvitje. /tesheshi.com/
