Milani dhe Interi kanë dhënë një shfaqje futbollistike mbrëmë në derbin midis tyre, si rrallëherë në këto vitet e fundit.
I tërë takimi është përshkuar nga një lojë e ndezur, me ritëm, e nga shumë raste në të dy ekstremet e fushës.
Për të ardhur te golat. Interi duhej të kishte kaluar në epërsi në pjesën e parë, por golin e shënoi Suso i Milanit në minutat e fundit. Candreva dha spektakël me gjuajtjen e tij kur barazoi në minutën 53-të. I njëjti lojtar, Suso, do të shënonte një tjetër gol për pritësit pak më tutje. Dhe pikërisht atëherë kur Milani po bëhej gati për të festuar, Perisic godet… dhe 2-2!
Barazimi e mban Milanin në vend të tretë në klasifikimin e Serisë A, me po aq pikë sa Roma e vendit të dytë. Ndërsa Interi qëndron në vend të nëntë, me 18 pikë.
“Mund të shkojmë në shtëpi dhe të flemë mirë, sepse bëmë një paraqitje të madhe dhe treguam shpirt të madh,” është shprehur Vincenzo Montella, trajneri i Milanit, i ashtuquajturi “aeroplani” kur luante vetë futboll.
“Ishte një mbrëmje thuajse e përsosur. Unë përpiqem ta shoh gotën gjysmë të mbushur.”
Sidoqoftë, ai e ka pranuar se dhe Interi ka bërë një paraqitje të mirë.
“Mbase Interi nuk meritonte të humbiste, por nëse Milani do të kishte fituar, askush nuk mund të thoshte se nuk e merituam fitoren.” /tesheshi.com/
