Nuk ka barazi gjinore vetëm në politikë apo në shoqërinë civile. Kuotat e grave po e respekton edhe nga krimi i organizuar botëror. Madje është më përpara pjesës tjetër të shoqërisë.
Mafia më e famshme në botë, Cosa Nostra siçiliane, pas vdekjes së Toto Riinës ka vendosur në krye të kupolës një grua.
Siç bën të ditur ANSA, se Maria Angela Di Trapani, vajza e një kapomafie dhe gruaja e bosit historik, Salvino Madonia, është mbretëresha e Cosa Nostra-s. Ky përfundim ka dalë nga një hetim i karabinierëve të koordinuar nga Drejtoria Hetimore Antimafia e Palermos, e cila ka arrestuar 25 persona të akuzuar për lidhje me mafian, gjobëvënie, rrushfet dhe korrupsion.
Të penduarit kanë folur që në të shkuarën për rolin e Mariangela Di Trapani, madje gruaja u arrestua në vitin 2008. Sipas hetimeve, ajo drejtonte klanet ndërsa burri i saj dergjej në burgimin e përjetshëm.
Pasi u dënua me 8 vjet ajo e mbaroi dënimin. E bija e bosit Ciçio Di Trapani, motra e një bosi tjetër, Nicola, thirrej me nofkën “a piçiridda” (vogëlushja).
Në një përgjim telefonik, vëllai i flet me butësi: “Mariangela ka vuajtur shumë, madje edhe në shkollë nuk ka shkuar nga dashuria për babain dhe për mua”.
Gruaja e Salvinos, vrasësit të biznesmenit Libero Grassi, shfrytëzonte takimet në burg me të shoqin dhe kunetërit Nino dhe Giuseppe, njëkohësisht krerë të mafias, për të mbajtur kontaktet e familjarëve me klanin Resuttana, të drejtuar nga familja Madonia, në kohët kur në komandë ishte vjehhri i Mariangela-s, Francesco.
Nga hetimi del edhe roli aktual i gruas, e cila ka marrë në dorë kontrollin e klaneve dhe peshën e familjes Madonia, e cila është shumë e fuqishme në kupolën e Cosa Nostra-s.
Një nga vendimet e rëndësishme që ka marrë kryebosja ishte ai i eleminimit të regjentit të atëhershëm të klanit të San Lorenzo-s, Giovanni Bonanno.
Mafiozi, përveçse pengonte qeverisjen e Mariangela-s, kishte hapur fjalë që i biri i saj nuk ka lindur me inseminim artificial por ishte frut i një tradhëtie. Një akuzë e tillë, sipas ligjeve të mafia-s, nuk mund të rrinte pa u dënuar.
“Përgjigja që ti duhet t’i japësh Salvos është se ai nuk ekziston më”, i tha Nino Madonia, Mariangela-s, e cila më pas i transmetoi mesazhin të shoqit.
Bonanno u vra në janarin e vitit 2006 dhe një muaj më pas, bosi Salvatore Lo Piçolo i shkruante në një letër Bernardo Provenzano-s, në atë kohë ende i arratisur: “Fatkeqësisht nuk pati mënyrë tjetër për të gjetur zgjidhje alternative. Ndaj morëm këtë vendim të hidhur”.
Mariangela Di Trapani nuk është në fakt bosja e vetme me fund në radhët e Cosa Nostra-s; rasti i fundit është ai i Patrizia Messina Denaro, motra e bosit të arratisurit Matteo Messina Denaro, e arrestuar në vitin 2013.
Përgatiti: Ylli Pata – /tesheshi.com/
