Presidenti i SHBA-ve, i shoqëruar nga Ashton Carter, sekretari amerikan i Mbrojtjes, vizitojnë sot Arabinë Saudite.
Sot është paraparë një vizitë me mbretin Selman, kurse nesër do të ketë një takim me udhëheqësit e Këshillit të Bashkëpunimit të Gjirit.
Marrëdhëniet mes Arabisë Saudite dhe SHBA-ve kanë pësuar një lloj ftohjeje pas mospajtimeve mbi një seri çështjesh, posaçërisht mbi marrëveshjen bërthamore me Iranin nën kryesimin e amerikanëve.
Vizita e Obama-s kërkon t’i japë fund një ngërçi të tillë, ndërsa sauditët janë blerësit më të mëdhenj të armëve amerikane, si dhe eksportuesit numër një të naftës në botë.
Obama pritet t’i nxisë Arabinë Saudite dhe vendet e tjera të Gjirit Persik për një bashkëpunim më të thellë dhe për mbështetje ushtarake në luftën kundër ISIS-it.
Abdullatif ez-Zejani, sekretari i përgjithshëm i Këshillit të Bashkëpunimit të Gjirit, ka deklaruar të martën se objektivi i takimit me presidentin amerikan do të jetë çimentimi i lidhjeve të ndërsjellta nëpërmjet dialogut dhe diplomacisë.
Takimi i së enjtes, sipas ez-Zejanit, do të përqendrohet në çështjet e paqes dhe sigurisë në Gjirin Persik dhe në Lindjen e Mesme. “Takimi është projektuar si një demonstrim i pacenueshmërisë së marrëdhënieve mes shteteve të Gjirit dhe Uashingtonit në sfondin e një marrëveshjeje me Iranin dhe të trazirave në rajon.”
Ai ka shpjeguar se takimi i nesërm është organizuar me ftesë të mbretit saudit.
Marrëdhëniet dypalëshe dhe shumëpalëshe, çështjet rajonale dhe ndërkombëtare, ku, sigurisht, situata në Siri, Jemen e Irak, zë vend të posaçëm, janë ato çka do të diskutohen në takimin e nesërm. Në bisedime do t’i kushtohet hapësirë dhe ndërhyrjes së Iranit në punët e brendshme të vendeve të Këshillit të Bashkëpunimit të Gjirit. /tesheshi.com/
