Nga Blendi Gashi
Nuk ka pothuajse një seancë të vetme plenare që Kuvendi i Kosovës të mos ballafaqohet me mungesë kuorumi, për çka në vazhdimësi pamundësohet votimi i projektligjeve të ndryshme.
Në të shumtën e rasteve deputetët gjenden brenda objektit të Kuvendit, por parapëlqejnë të rrinë në kafe. Tek e fundit rroga u ecën dhe askush nuk i ndëshkon.
Dhe ka nga ata zëra që hedhin idenë se ata, jo vetëm duhet të ndëshkohen me heqje page, por dhe t’u publikohet emri për moskorrektësi.
Këtë propozim e jep Shemsi Jashari, analist politik.
“Deputetët e papapërgjegjshëm, nëse mungojnë në seanca pa arsye, atëherë Kryesia e Kuvendit mund t’i disiplinojë lehtë, ku përveç ndaljes së mëditjeve, duhet të bëjë edhe publikimin e emrave në mënyrë që qytetarët të dijnë saktë se kush po e keqpërdor mandatin dhe besimin e tyre. Gjithashtu, kryetarët e partive kanë mundësit e disiplinimit të tyre duke ua bërë me dije se nëse nuk tregohen të përgjegjshëm në mandatin e tashëm, nuk do të futen në lista për deputetë në mandatin e ardhshëm”, thotë Jashari për tesheshi.com.
Arsim Haziri, njohës i rrethanave politike thotë se legjislatura aktuale përmes neglizhencës së treguar në vazhdimësi ka dëshmuar se nuk është e interesuar për të shtyrë përpara ligjet por të për ambiciet personale.
“Si pushteti politik edhe niveli opozitarë nga veprimtaria që po e zhvillojnë brenda institucioneve publike kanë vënë në spikamë se me çdo kusht qëndrojnë jashta obligimeve ligjore, këtë madje e ribën publik edhe përmes mosbashkëpunimit për zgjidhjen e problemeve bazike. Ndëshkimi qytetar do të ishte ndëshkimi më i mirë për mospunën dhe neglizhencën që janë duke e treguar. Kësaj skene politike aspak nuk i intereson zhvillimi dhe fuqizimi i gjendjes së brendshme, kjo është mjaft evidente për të mos qenë asnjëherë e mohueshme. Qeverisja e mirë dhe e dinjitetshme mbi gjitha efektive në luftimin e dukurive devijante, do të ishte sikur të zbatonte ligjet”, thotë Haziri për tesheshi.com. /tesheshi.com/
