Banorët e fshatit të Ndroqit janë ngritur në një protestë paqësore ditën e sotme, për ndërtimin e rrugës kryesore në këtë fshat, e cila lidh qytetin e Tiranës me qytetin e Durrësit. Ata shprehen se prej mungesës së kësaj rruge ka rënë ekonomia e këtij fshati dhe duke qenë se rruga është e amortizuar, produktet e tyre ushqimore dalin jashtë standardit ndërsa transportohen.
“Është rrugë nacionale. Të gjithë e shohin që rruga është e amortizuar komplet. Nuk kemi rrugë për të shkuar në Tiranë e në Durrës. Në punojmë, prodhojmë e i vjelim me standarde normale dhe kur vjen puna për t’i çuar në Tiranë domatet i çojmë për salcë e fikun për marmalatë”,- thotë njëri prej banorëve të dalë në protestë.
Ata i luten qeverisë, Kryeministrit, Ministrit të Transporteve Edmond Haxhinasto të vënë dorë në këtë rrugë. Sipas banorëve, për 25 vite me radhë, çdo parti që ka ardhur në pushtet nuk ka vënë dorë në këtë rrugë.
“Kur do bëhet kjo rrugë? Kush do ta bëjë këtë rrugë? Kemi një muaj që kemi bërë peticion, kemi mbledhur 1 mijë firma. Ne duam një protestë paqësore siç po e bëjmë, pasi nuk duam të prishim e shkatërrojmë këtë vend. Duam të bëhet rruga sa më shpejt. Ne do ta ngremë sërish zërin nëse vazhdohet kështu”,- shprehet një tjetër banor.
Në vijim, banorët deklarojnë se nëse nuk merren masa do të vijojnë deri në protesta që të bllokohet rruga, por këtë gjë ata shprehen se nuk e duan.
Sipas banorëve, bizneset janë të penalizuara nga mungesa e investimeve, pasi, siç prehen ata, duke qenë se nuk ka rrugë, as bizneset e reja nuk vijnë në këtë zonë./tesheshi.com/
