Pak ditë pasi në seancën e Kuvendit të Kosovës, ministri i Brendshëm Bejtush Gashi pranoi se shteti nuk ka kontroll të plotë në fshatin Karaçevë në kufi me Serbinë, ai doli të mërkurën në teren së bashku me ushtruesin e detyrës së drejtorit të policisë Naim Rexha dhe kreun e Kamenicës Qëndron Kastrati ku u informuan nga banorët e kësaj zone për problemet që kanë me shtetin serb rreth tokave në këtë pjesë.
Përfaqësuesi i fshatit Karaçevë, Selver Lenjani ka lutur të gjithë ata që duan t’i ruajnë tokat e brezit kufitar që të bëjnë diçka, pasi sipas tij, me marrëveshjen e Kumanovës janë copëtuar tokat e brezit kufitar.
“Kërkojmë nga ju që të përdorni autoritetin e juaj nga ministri, nga kryeministri i Kosovës, nga presidenti, nga kryeparlamentari, nga deputetë e Kuvendit që të marrin një vendim të prerë, decidiv për të ruajtur tokat shekullore etnike të banorëve të brezit kufitar. Me Karaçevën ruhen 11 mijë kilometra katrorë. I nderuar nuk lëshojmë pe në rrugën “By-pass” (rrugë e vetme e cila ka mundësuar policisë të ketë qasje në tri nga fshatrat e kësaj zone). Aktualisht nuk ka hyrje të policisë së Kosovës, në rrugën e asfaltuar. Që nga viti 2001 janë probleme që nuk janë marrë institucionet e Kosovës”, u tha Lenjani krerëve të shtetit.
Ministri Gashi pranoi se janë tre fshatra të Kamenicës që nuk e kanë kontrollin policor për shkak të një vendimi që është nxjerrë nga ana e komandantit të KFOR-it, Salvadore Farina në vitin 2014.
“Perimetri i kufirit është nën autoritetin e KFOR-it dhe realisht do të bisedoj me komandantin e KFOR-it për të shtuar patrullimet e përbashkëta në këtë zonë. Ka edhe zgjidhje tjera si alternativë ose plane tjera. Të shohim do t’iu informojmë me kohë cilat janë ato plane për të pasur ekipe tona patrulluese edhe në ato fshatra që aktualisht janë të pambuluara nga njësitet patrulluese të Policisë së Kosovës”, u tha ministri Gashi banorëve të Karaçevës.
Kujtojmë se portali ynë tre vjet më parë, saktësisht më 25 maj të 2015-tës realizoi një intervistë me kryetarin e fshatit Karaçevë, Selver Lenjani i cili ka treguar hollësisht për problemet që kanë me shtetin serb.
Intervistën mund ta lexoni në këtë link: http://localhost/tesheshi/te-jetosh-ngjitazi-me-serbin-ne-karaqeve-atje-ku-gjumi-nuk-behet-rehat/
Përgatiti: Blendi Gashi – tesheshi.com
