Ndonëse ndodhet pak km larg zonës urbane të kryeqytetit, banorët Alliasit deri më sot kalonin disa lagje për të bërë një vizitë tek mjeku. Sot, kjo situatë më në fund merr “kthesë”, pasi u inagurua hapja e qendrës së re shëndetësore. Megjithatë, edhe ky investim erdhi si bashkëpunim i projektit “Save dhe Children” me ministrinë e Shëndetësisë dhe bashkisë së Tiranës.
Të pranishëm në ceremoninë e përurimit ishin ministri i Shëndetësisë, ilir Beqaj, nënkryetari i Bashkisë së Tiranës, Arbjan Mazniku, si dhe Drejtori Ekzekutiv i “Save the Children” Zvicër, Omer Guven.
Ministri Beqaj tha se ky investim u vjen në ndihmë rreth 10 mijë banorëve. “Krijimi i kësaj qendreje këtu i ofron mundësi të gjithë këtij komuniteti, që nga nënat shtatzënë deri tek më të moshuarit ta kenë shumë pranë shërbimin shëndetësor, madje, nëse shohim kushtet ku do të ofrohet ky kujdes këtu, duhet ta pranojmë që ka kushte shumë më të mira edhe se Qendra Shëndetësore që janë shumë të ngarkuara që janë në mes të qytetit të Tiranës. Është një nga projektet që, prej tre vjetësh “Save the Children”, ka në fokusin e vet nënën dhe fëmijën, mbështet shëndetësinë shqiptare”, ka nënvizuar Beqaj.
Për nënryetarin e bashkisë, këto investime përmirësojnë jetën e qytetarëve. “Për të marrë këtë shërbim banorët nuk kanë nevojë tashmë që të bëjnë udhëtime të gjata. Gjatë këtij viti ne synojmë që gjithashtu të fillojmë dhe investimet në përmirësimin e rrugës dhe eventualisht në shtimin dhe densifikimin në këtë zonë të transportit publik për ta kthyer këtë në një zonë e cila ka mundësi të jetojë në mënyrë dinjitoze si një pjesë e rëndësishme e qytetit të Tiranës” theksoi Mazniku.
Çelësi i suksesit të këtij projekti, u shpreh Guven është bashkëpunimi i mirë me ministrinë e Shëndetësisë dhe bashkinë e Tiranës, për zbatimin e këtij modeli të ri të ofrimit të shërbimit shëndetësor, për për çdo nënë dhe fëmijë të zonave peri-urbane të Tiranës.
Shërbimet shëndetësore që do të ofrojë qendra janë të ndryshme si për të rritur, për fëmijë, për gratë shtatzëna në konsultore, për vaksinimin e të vegjëlve, kontroll mjekësor bazë për të gjithë qytetarët e grupmoshës 35 – 70 vjeç në kabinetin e check–up etj./tesheshi.com
