Pas pesë muajsh me ushtrues detyre, Banka Qendrore e Kosovës është bërë me guvernator të ri. Me shumicë votash, Fehmi Mehmeti është zgjedhur pasardhës i Bedri Hamzës i cili la këtë institucion për të marrë postin e ministrit të Financave.
Mehmeti, pas votimit të fshehtë të deputetëve mori 60 vota, duke dale mbi tre kandidatët e tjerë: Shkëndije Himajn, e cila mori 15 vota, Besnik Bislimi që mori 31 vota dhe Safet Merovcin që mori vetëm katër vota.
Për dallim nga drejtorët tjerë të ndërmarrjeve publike, Mehmeti nuk është në mesin e militantëve partiakë; të paktën jo publikisht.
Megjithatë, si edhe shumë të tjerë, edhe Mehmeti në kohën sa ka mbajtur pozitën e zv.Guvernatorit, sipas raportimeve të mediave kosovare është kujdesur për të ofruar afër vetes disa njerëz, pra t’i punësojë ata në BQK.
Aferdita Mehmeti, e afërme e Fehmi Mehmeti, e cila më parë kishte punuar në “ProCredit Bank” dhe në “TEB”, u emërua asistente ekzekutive në Zyrën e zv.Guvernatorit Mehmeti për Mbikëqyrje Financiare.
Shkollimi i Mehmetit…
Fehmi Mehmeti, më 11 shtator 2017 u emërua nga Bordi i BQK-së për ushtrues detyre e Guvernatorit deri në zgjedhjen e të riut, ndërsa në vitin 2013 u emërua në pozitën e zv.Guvernatorit për Mbikëqyrje Financiare në BQK. Në këtë pozitë, Mehmeti u ngarkua për licencimin, mbikëqyrjen dhe rregullimin e institucioneve financiare, të cilat operojnë në vend, apo në veçanti të bankave, institucioneve mikrofinanciare, institucioneve financiare jobankare, kompanive të sigurimit, të fondeve pensionale dhe letrave me vlerë.
Mehmeti, në vitin 1991 ka mbaruar studimet në Fakultetin Ekonomik të Universitetit të Prishtinës,. Në vitin 2012, ka përfunduar studimet pasuniversitare, drejtimi Tregje Financiare dhe Banka.
Gjatë viteve 1991-1992, z. Mehmeti ka punuar në shkollën e mesme “Marin Beçikemi” në Vushtrri, si ligjërues i lëndëve ekonomike, ndërsa gjatë viteve 1993-1998 ka punuar si udhëheqës financiar në ndërmarrje tregtare.
Gjatë viteve 1999-2001 ai ka punuar në Kuvendin Komunal në Vushtrri, fillimisht si zyrtar në departamentin e financave, e pastaj si Drejtor i Drejtorisë për Shëndetësi dhe Mirëqenie Sociale.
Në periudhën 2001-2011 mbajti pozicione të ndryshme në Administratën Tatimore të Kosovës, fillimisht në zyrën regjionale në Mitrovicë, si inspektor tatimor, e pastaj në Drejtorinë e Përgjithshme të Tatimeve në Prishtinë, fillimisht në pozitën e Këshilltarit për TVSH e pastaj si Menaxher i Kontrollit të Tatim paguesve. Gjatë kohës së angazhimit në Administratën Tatimore të Kosovës ka qenë pjesëmarrës aktiv në hartimin e Legjislacionit tatimor të Kosovës.
Ndërsa në periudhën 2011-2013 ka qenë fillimisht Zyrtar kryesor për buxhet dhe financa, Departamenti i Financave, e pastaj si Shef Kabineti i Kryeshefit Ekzekutiv, në Aeroportin Ndërkombëtar të Prishtinës. Gjatë kohës së angazhimit në Aeroportin Ndërkombëtar të Prishtinës , ka qenë pjesëmarrës aktiv në hartimin e Legjislacionit të Aeroportit Ndërkombëtar të Prishtinës.
Gjatë periudhës 2010-2013 ai ka qenë Drejtor Bordi në Ndërmarrjen Publike “Uniteti” me seli në Mitrovicë. Njëkohësisht, gjatë viteve 2011-2012 është angazhuar si bashkëpunëtor i jashtëm, Ligjërues në Universitetin e Prishtinës.
Përveç përvojës së lartcekur, Mehmeti ka titullin e Kontabilistit të Çertifikuar dhe është njohës shumë i mirë i çështjeve tatimore, dhe çështjeve te aviacionit civil.
Zëvendësguvernatori Fehmi Mehmeti është i lindur më 06.05.1969 në fshatin Beçiq, Komuna e Vushtrrisë.
Jeton në Prishtinë me bashkëshorten e tij znj. Fatime Mehmeti dhe kanë tre fëmijë: Ermirin, Ermirën dhe Ardianin. /tesheshi.com/
