Sipas të dhënave të Bankës Botërore, Kosova ende përballet me shkallë të lartë të varfërisë, dhe është më e varfëra në rajon dhe në Evropë në përgjithësi.
Zëvendësdrejtoresha e Bankës Botërore për Kosovën, Jane Sprouster, tha për televizionin RTV 21 nga Prishtina se të ardhurat për kokë banori janë ende të ulëta në krahasim me mesataren e vendeve anëtare të BE-së, dhe shkalla e varfërisë është ende më e lartë, pak mbi 19 për qind.
“Ne besojmë se për të arritur progres të qëndrueshëm në reduktimin e varfërisë dhe rritjen e prosperitetit të përbashkët, Kosova duhet të kalojë në një model të rritjes ekonomike konkurruese që krijon më shumë dhe vende pune më të mira për të gjithë njerëzit e Kosovës”, tha ajo.
Sprouster gjithashtu deklaroi se “ofrimi i vendeve të punës cilësore të mjaftueshme për banorët e rinj të Kosovës do të ndihmojë në kapërcimin e hendekut të të ardhurave me BE-në”.
GDP më e ulët në rajon
Sipas saj, niveli i prodhimit të brendshëm bruto në Kosovë është më i ulëti në rajon dhe arrin mesatarisht 5,589 euro, dhe se për shkak të këtij niveli ekonomik, qytetarët ankohen se muajin e kanë të vështirë ta mbulojnë me të ardhurat që kanë.
Në fillim të vitit 2024, Programi i Kombeve të Bashkuara për Zhvillim (UNDP) raportoi për thellimin e varfërisë në Kosovë.
Sipas asaj organizate, dhjetë për qind e familjeve në Kosovë mbijetojnë me më pak se dy euro në ditë.
Sipas të dhënave të Bankës Botërore, Kosova ende ka përqindjen më të lartë të të papunëve në rajon – vetëm 37 për qind e popullsisë në moshë pune është e punësuar. /tesheshi.com/
