Luftërat, borxhet, kriza klimatike dhe pandemia kanë ndalur përparimin në luftën kundër varfërisë, ka paralajmëruar Banka Botërore.
Institucioni me bazë në Uashington tha se sipas tendencave aktuale, do të duhen më shumë se 30 vjet që afro 700 milionë njerëz që jetojnë me më pak se 2.15 dollarë në ditë të ngrihen mbi përkufizimin e pranuar përgjithësisht të varfërisë ekstreme, raportoi Guardian.
Në raportin e saj për varfërinë, prosperitetin dhe planetin, Banka Botërore deklaroi se tashmë është “e pamundur” të arrihet objektivi i vendosur nga Kombet e Bashkuara për t’i dhënë fund varfërisë ekstreme deri në vitin 2030.
Varfëri ekstreme
Varfëria ekstreme është ende e përhapur në vendet me rritje të ulët ekonomike, shumë prej të cilave janë në Afrikë.
“Pas dekadash progresi, bota po përjeton pengesa serioze në luftën kundër varfërisë globale”, tha Drejtori Ekzekutiv i Bankës Botërore, Axel Van Trotsenburg.
Raporti thoshte se do të duhej më shumë se një shekull për të përmbushur objektivin e rritjes së të ardhurave mbi 6.85 dollarë në ditë, i cili konsiderohet kufiri i varfërisë për vendet me të ardhura të mesme të larta si Argjentina, Botsvana dhe Kina.
Aktualisht, 3.5 miliardë njerëz, gati gjysma e popullsisë së botës, jetojnë me më pak se 6.85 dollarë në ditë dhe Banka Botërore tha se rritja e popullsisë do të thotë se numri i njerëzve të varfër me këtë masë mezi ka ndryshuar që nga viti 1990. /tesheshi.com/
