Në samitin e Tiranës të Procesit të Berlinit, kryministri Kurti i kujtoi lidershipit europian se duhet ta ndëshkojë Serbinë nisur nga ajo çfarë ndodhi më 24 shtator, pasi sipas tij, Kosova kërcënohet të pushtohet nga Serbia.
Dhe mjafton ky fakt, sipas Kurtit, që Procesi i Berlini, si dhe ky samit, të mos ketë asnjë vlerë.
“Në një sulm terrorist kundër Kosovës më 24 shtator, një nga oficerët tanë të policisë u vra, por autorët ende enden të lirë në Serbi, edhe pse publikisht e pranuan përfshirjen e tyre. Ky ishte një akt i urryer i sponsorizuar nga Serbia, siç tregojnë provat e pakundërshtueshme. Ne kemi konfiskuar mbi pesë milionë euro armatim dhe municione të sofistikuara të prodhuara në Kragujevc dhe Çaçak. Katër herë në dy vitet e fundit, Serbia ka sjellë ushtrinë e saj në kufirin tonë. Edhe njëzet e pesë vjet pas fushatës gjenocidale, dhe pas kaq shumë raundeve të dialogut, Kosova ende kërcënohet me pushtim nga Serbia. Ky moment na kërkon të reflektojmë dhe të mos e vazhdojmë punën si zakonisht. Një veprim i tillë nuk duhet të mbetet pa u ndëshkuar”, tha Kurti.
Ai vijoi më tej duke thënë se pajtohet plotësisht me vizionin e Procesit të Berlinit, ama nëse ka siguri e garanci të qytetarët që këta të fundir të mos jetojnë me frikën se të nesërmen mund të shpërthejë një konflikt.
“Qytetarët në Ballkanin Perëndimor sot nuk duhet të jetojnë nën frikën e konfliktit nesër, por të punojnë për një të ardhme së bashku. Ne si udhëheqës të tyre kemi përgjegjësinë për të ndërtuar atë të ardhme të përbashkët. Dhe si udhëheqës ne duhet të përfshihemi në atë proces me mirëbesim. Kërkohet një angazhim me mirëbesim për të garantuar efektivitetin afatgjatë të marrëveshjeve tona dhe respektimin e të gjitha palëve të investuara në proces”, arsyetoi Kurti. /tesheshi.com/
