Kryeministrja e Bangladeshit, Sheikh Hasina i bëri thirrje Myanmar-it që lejojë kthimin e qindra-mijëra myslimanëve Rohingya që kanë ikur nga dhuna në shtetin Rakhine.
Gjatë vizitës në një kamp të refugjatëve, ajo tha se Myanmari duhet të shohë situatën me humanizëm, sepse “njerëz të pafajshëm janë duke vuajtur”.
Rreth 370,000 myslimanë kanë ikur nga Myanmari në Bangladesh, si rezultat i dhunës së nisur në fund të muajit gusht.
Refugjatët akuzojnë forcat e sigurisë në Myanmar dhe turmat budiste për djegien e fshatrave të tyre.
Qeveria thotë se forcat e sigurisë janë duke iu përgjigjur një sulmi të militantëve Rohingya kundër postblloqeve policore, që ka ndodhur më 25 gusht.
Shtëpia e Bardhë e dënoi sërish dhunën.
“Shtetet e Bashkuara janë thellësisht të shqetësuara me krizën e vazhdueshme në Myanmar, ku së paku 300,000 njerëz kanë ikur nga shtëpitë e tyre, pas sulmeve ndaj postblloqeve të sigurisë më 25 gusht”, tha zëdhënësja e Shtëpisë së Bardhë, Sarah Sanders. /tesheshi.com/
