Nga Blendi Gashi
Shefat e grupeve parlamentare të partive në Kosovë ashtu si edhe ministrat e kolegët e tyre deputet kanë deklaruar pasuri tejet të madhe në formularët e deklarimit të pasurisë.
Adem Grabovci shef i GP të PDK-së, Ismet Beqiri shef i GP të LDK-së, Glauk Konjufca shef i GP të W-së, Pal Lekaj shef i GP të AAK-së dhe Valdete Bajrami shefe e GP të NISMA-s posedojnë banesa, shtëpi, tokë, vikendica pushimi, vetura super të shtrenjta, poashtu kanë shuma të majme parash të ruajtura në bankë, por janë detyruar të marrin edhe kredi në banka për nevoja të ndryshme familjare.
Më i pasuri nga shefat e grupeve parlamentare del të jetë Pal Lekaj i AAK-së kurse më i varfër shefja e GP të NISMA-s, Valdete Bajrami, e cila ka deklaruar vetëm 236 euro para të ruajtura në bankë.
Adem Grabovci i PDK-së, ka dy banesa dhe mbi 10 mijë euro të kursyera.
Shefi i “shefave” siç njihet Adem Grabovci nga deklarimi i pasurisë del të jetë tejet i pasur.
Ai posedon dy banesa, njërën në vlerë 80.00 m2 të cilën thotë se e ka blerë me paratë nga puna në Zvicër në vitin 2001, dhe tjetrën 117.00 m2 të cilën thotë se e ka blerë me para të kursyera.
Po ashtu, ai ka deklaruar shumë tokë të cilën thotë se e ka trashëguar.
Grabovci nget veturë të tipit BMW të cilën thotë se e ka blerë nga sigurimi kasko i Mercedesit dhe kursimet.
Ndërsa para të gatshme të ruajtura në bankë ka mbi 10 mijë euro së bashku me bashkëshorten.
Shefi i GP të PDK-së, ka edhe kredi orej 15 mijë eurove të cilën duhet ta paguajë brenda 36 muajve.
Ismet Beqiri i LDK-së, ka banesë në vlerë 232 mijë euro
Pasanik i vërtetë është edhe shefi i GP të LDK-së Ismet Beqiri i cili posedon banesë 116.00 m2 në vlerë 232 mijë euro .
Beqiri ka në posedim veturë në vlerë 6 mijë euro të blerë më 2012, ndërsa para të kursyera në bankë në emër të vet ka 12 mijë e 350 euro, kurse bashkëshortja e tij ka të kursyera 3 mijë euro.
Ndërsa, ka edhe një kredi që e ka marrë në vitin 2011 dhe duhet ta kthejë deri në vitin 2017 në vlerë 20 mijë euro.
Glauk Konjufca i W-së mbi 12 mijë euro para të ruajtura në bankë
Edhe pse zyrtarët e Lëvizjes Vetëvendosje e konsiderojnë vetën të “varfër” në krahasim me kolegët e tyre nga partite në pushtet, shefi i GP të W-së Glauk Konjufca sipas deklarimit që ka bërë del të jetë i pasur.
Konjufca posedon banesë 115 m2 në vlerë 70 mijë euro, 95 ari tokë (trashëgimi familjare 1994) në vlerë 30 mijë euro, 8.53 ari truall (pronë familjare 2002) në vlerë 80 mijë euro.
Konufjca poashtu ka deklaruar një shtëpi të papërfunduar, shtëpi vikendi 130 m2 në vlerë 30 mijë euro të cilën thotë se e ka blerë në vitin 2013 nga kursimet familjare dhe kredia që ka marrë.
Konjufca vozitë veturë Passat 3c në vlerë 7300 euro të blerë në vitin 2015 nga kursimet.
Ndërsa, para të ruajtura në bankë i ka saktësisht12,660 euro.
Pal Lekaj i AAK-së, 13 vetura në pronësi të përbashkët
Më i pasuri nga shefat e grupeve parlamentare të partive parlamentare është shefi i GP të AAK-së Pal Lekaj.
Ish kreu i Gjakovës ka deklaruar shtëpi 360.00 m2 në vlerë 280 mijë euro (Familjare 1990), 3 hektarë tokë, dhe dy restaurant familjare në vlerë mbi 500 mijë euro.
Pali po ashtu ka deklaruar edhe disa vetura porn ë pronësi të përbashkët familjare.
– Mercedes në vlerë 15 mijë euro
-Mercedes Familjare 22 mijë euro
– BMW 22 mijë euro
-Golf 5 (5 copë) në vlerë 75 mijë euro
-Auto makinë 16 mijë euro
-Auto makinë 14 mijë euro
– BMW (3 copë) në vlerë 128,000.00
Lekaj ndërkaq nuk ka deklaruar të ketë para të ruajtura në bankë apo të ketë marrë kredi.
Valdete Bajrami e NISMA-s me veturë 11 mijë euro por veç 236 euro të kursyera
Nga të gjithë shefat e grupeve parlamentare më e “varfër” del të jetë Valdete Bajrami e partisë NISMA për Kosovën e ka deklaruar një shtëpi të përbashkët në vlerë 120 mijë euro dhe tokë, truall e mal, por në emër të bashkëshortit.
Edhe Valdetja si kolegët e saj vozit një veturë të shtrenjtë në vlerë 11 mijë euro të cilën thotë se e ka blerë në vitin 2014-të.
Kurse, për dallim nga shefat e GP tjerë të partive, Valdetja e NISMA-s ka deklaruar para të deponuara në bankë vetëm 236 euro.
/tesheshi.com/
