Vajza 7-vjeçare siriane e cila ka informuar prej kohësh qindra mijëra ndjekës të saj përmes postimeve në Twitter për ngjarjet në Halep, është evakuuar në një vend të sigurtë pas marrëveshjes midis autoriteteve turke dhe ruse për evakuimin e civilëve dhe luftëtarëve të opozitës.
Bana Alabed, e cila poston në llogarinë e saj @AlabedBana, është fotografuar në një foto selfie nga një punonjës i Fondacionit Turk OJQ Humanitar Ndihmës (IHH), jashtë Halepit.
“Welcome @AlabedBana”, ka postuar në Twitter një punonjës i IHH Burak Karacaoglu.
IHH gjithashtu konfirmoi se Bana dhe familja e saj arritën të shpëtojnë nga Halepi në mesin e një grupi prej 1500 njerëzish të hipur në 25 autobusë.
Bana, llogaria e të cilës menaxhohet nga ëma e saj Fatima e cila është mësuese e gjuhës angleze, kishte mbi 320,000 ndjekës që nga përfshirja e saj në rrjete sociale, në shtator të këtij viti. Ajo ka postuar foto dhe video nga e jeta e saj gjatë konfliktit gati gjashtë-vjeçar, së bashku me përditësimet mbi bombardimet ajrore të cilat kanë shkatërruar pjesë të qytetit të saj dhe kanë vrarë civilë.
Ajo gjithashtu poston video dhe fotografi të saj dhe vëllait të saj, duke lexuar apo vizatuar për të shkëputur vëmendjen nga sulmet ajrore.
Javë më parë, një postim i saj në Twitter kishte arritur tek ministri i jashtëm turk Mevlüt Çavuşoğlu, në të cilin ajo kishte pyetur: “Z.Mevlüt Çavuşoğlu, ne kishim shpresë dje, por çfarë po ndodh tani?”, për të vazhduar me një lutje për të: “Ju lutemi të na ndihmoni tani. Nuk ka mbetur shumë kohë. Faleminderit..”
Pa vonuar shumë, ministri Çavuşoğlu u përgjigj poashtu në Twitter: “Mbaje shpresën motra ime. Turqia dëgjon thirrjen tuaj. Ne po punojmë shumë për t’i dhënë fund makthit nëpër të cilin po kaloni ju dhe shumë fëmijë tjerë në Siri…”
Bana përmes postimeve në Twitter ka kërkuar ndihmë edhe nga presidenti amerikan, Obama dhe kryeministrja e Britanisë së Madhe, Theresa May. /teshesh.com/
