Sekretari i përgjithshëm i OKB-së, Ban Ki-Moon, e përshkroi dje si krim lufte atë çka po ngjet në Siri, posaçërisht në Madaja e në pjesë të tjera të vendit, ku njerëzit po vdesin nga uria për shkak të rrethimit dhe pamundësisë për t’u furnizuar.
Bashkë me ndihmat e dërguara në Madaja për 42.000 banorët e bllokuar keqaz për më tepër se gjashtë muaj, u zbulua dhe gjendja e tmerrshme e njerëzve në atë vend, me ç’rast Ban Ki-Moon e akuzoi dhe qeverinë siriane për kryerjen e një krimi lufte.
“Shfrytëzimi i urisë si një armë lufte është një krim lufte. Të tëra palët, duke përfshirë qeverinë siriane, e cila ka përgjegjësinë kryesore për t’i mbrojtur sirianët, po e kryejnë këtë dhe akte të tjera mizore të ndaluara nën ligjin ndërkombëtar humanitar,” u tha ai gazetarëve në selinë në Nju-Jork.
Madaja është e rrethuar nga forcat e regjimit sirian, ndërsa sekretari i përgjithshëm shpjegoi pamundësinë e OKB-së për të dërguar ndihma, “OKB-ja dhe partnerët ishin në gjendje në 2014-ën të dërgonin ushqime për pesë për qind të popullsisë në zonat e rrethuara. Sot arrijmë në një për qind të tyre.”
Karvane me ndihma nga një numër organizatash mbërritën në fillim të kësaj jave në pjesë të Sirisë ku njerëzit po vdisnin nga uria. /tesheshi.com/
