Sekretari i Përgjithshëm i OKB-së, Ban Ki-moon u shpreh i tronditur nga dhuna e përdorur ndaj refugjatëve prej policisë hungareze në kufi, ku përdori edhe gaz lotsjellës e presionin e ujit për të zmprapsur njerëzit.
Ai e cilësoi një trajtim të tillë të papranueshëm.
Me qindra refugjatë u përfshinë në përleshjet e një dite më parë në kufirin mes Hungarisë dhe Serbisë, ndërsa përpiqeshin të kalonin gardhin me gjemba të ngritur nga autoritetet hungareze për të kontrolluar fluksin e refugjatëve.
Hungaria e mbrojti qëndrimin e saj duke thënë se 20 policë u plagosën ndërsa refugjatët sulmuan përmes një prej portave, ndërsa një zëdhënës i qeverisë i akuzoi ata se përdorën fëmijët si “mburoja njerëzore”.
Të paktën dy refugjatë u plagosën gjatë përleshjeve.
Një pjesë e refugjatëve qëndron ende në kampet përgjatë kufirit hungarez, por shumë prej tyre i janë drejtuar një rruge të re për të kaluar në Austri dhe më pas në Gjermani, rrugës përmes kufirit me Kroacinë.
Hungaria e mbylli tërësisht kufirin me Serbinë të martën, pasi e shpalli vepër penale kalimin illegal të kufirit apo dëmtimin e gardhit. Gjykatat e vendit kanë nisur procese të shpejta gjyqësore për emigrantët e arrestuar për këto vepra.
Më shumë se 20 mijë refugjatë ndodhen tashmë në Hungari këtë vit. /tesheshi.com/
