Ban Ki-moon apel donatorëve: 100 milionë dollarë që fëmijët palestinezë të nisin vitin shkollor

Sekretari i Përgjithshëm i OKB-së, Ban Ki-moon apeloi për donacione urgjente që të mblidhet një fond prej 100 milionë dollarësh në ndihmë të refugjatëve palestinezë.

Me anë të një deklarate, shefi i OKB-së shpreh shqetësimin për krizën humanitare dhe atë të sigurisë që do të krijohej nëse agjencia që mbulon refugjatët të mos marrë fondet e duhura nga donatorët.

Agjencia e cila kujdeset për rreth 5 milionë refugjatë të regjistruar palestinezë, kishte deklaruar më herët se përballej me krizën më të rëndë financiare.

Agjencia kërkon 100 milionë dollarë për të financiar vitin e ri shkollor për rreth 700 shkolla dhe gjysmë milioni nxënës në të gjithë Lindjen e Mesme.

Ban u kërkoi donatorëve të mbledhin sa më shpejt fondin në mënyrë që fëmijët palestinezë të nisin vitin shkollor pa vonesa.

Mungesa e parave për agjencinë, bëri që në fillim të vitit të ndërpriteshin pagesat për rindërtimin shtëpive në Gaza të dëmtuara nga fushata izraelite  e verës së kaluar. /tesheshi.com/