Ish-Presidenti i Republikës Bamir Topi, sot aleat i Ramës në mazhorancë, deklaroi se megjithë presionin e Ilir Metës qeveria aktuale nuk do të ndryshojë dhe do të shkohet pas 10 muajsh në zgjedhje me këto ministra.
“Këndvështrimi im rreth punës së qeverisë sigurisht që është i ndryshëm. Për ata që janë në qeveri gjithçka shkon më së miri. Për ata që janë në opozitë gjithçka shkon blozë. Për aleatët në qeveri sigurisht që prevalon interesi për të pasur sa më shumë pushtet që do t’i garantojë “të mirat” që burojnë nga pushteti. Për të tjerët që janë jashtë këtyre grupimeve interesi jetik është ai publik. Këtu çdo subjekt politik ka zërin e tij, por media duhet të bëjë skanerin dhe jo të dëgjojmë disa zëra opinionistësh që s’ka pikë dyshimi që janë blerë nga partitë politike që duan ta dominojnë publikun me zëra “të papërlyer” me pushtetet. Sidoqoftë zgjedhjet politike janë pas 10 muajsh. Dhe sipas parashikimeve të mia muajt e mbetur nuk do të ofrojnë surpriza për ndryshime. Gjithçka që dëgjojmë është retorike politike. Me gjithë problemet në eficiencë apo marrëdhëniet brenda koalicionit, kjo qeveri do ta përfundojë inercinë e ecjes mes debateve dhe pakënaqësive që janë në treg”, tha kryetari i Frymës së Re Demokratike në një intervistë për “Shekulli”.
Ndërkaq në lidhje me koalicionin e Dibrës, Topi deklaroi se partia e tij “abstenon”.
“Zgjedhjet jashtë radhe në Dibër erdhën në një kohë kur FRDja nuk ka mbajtur ndonjë pozicion të ri politik në funksion të administrimit të pushtetit vendor. Në këtë kontekst ne kemi respektuar ndjeshmërinë lokale të përfaqësuesve tanë, të cilët nuk kanë pasur ftesa për administrim të pushtetit në Dibër dhe as ftesë për ngjarjen e radhës. Sa i takon mundësive për koalicion për zgjedhjet politike e kemi kohën e mjaftueshme për të vlerësuar konjukturat dhe interesat politike të FRDsë, që mbetet një forcë politike e moderuar dhe me vullnet për të bashkëpunuar për Shqipërinë”, tha Topi.
/tesheshi.com/
