Nga Blendi Gashi
Në mesin e shumë koalicioneve të lidhur të dielën për balotazhin e lokaleve të 19 nëntorit, është edhe ai mes PDK-së së Kadri Veselit dhe Partisë Demokratike Turke të Kosovës (KDTP), Mahir Yakcilar. Këtë e ka bërë të ditur përmes një postimi në rrjetin social Facebook, duke e shoqëruar atë edhe me disa fotografi nga ceremonia e nënshkrimit të marrëveshjes.
“Koalicioni i arritur sot mes Partisë Demokratike të Kosovës dhe Partisë Demokratike Turke të Kosovës (KDTP), për bashkëqeverisje edhe në katër vjetët e ardhshëm në Prizren, është një tjetër hap për vulosjen e fitores më 19 nëntor. Me këtë marrëveshje, po përmbyllet mozaiku politik i këtij qyteti të bukur. Shaqir Totaj do të jetë kryetar i të gjithë qytetarëve të Komunës së Prizrenit, pa dallim partie politike e përkatësie etnike”, ka shkruar Vesei në Facebook, duke konfirmuar bashkëpunimin e gjatë që kanë këto parti për vite.
Por ndërtimi i këtij koalicioni aspak nuk i ka pëlqyer Lëvizjes Vetëvendosje, e cila synon ta rrëzojë nga pushteti PDK-në në këtë qytet me anë të kandidatit të saj Mytaher Haskuka, dhe përkundër koaliconit në fjalë beson në votën e komunitetin turk.
Shkodran Hoti, zyrtar për media në Vetëvendosje uron që turqit në Prizren të mos e dëgjojnë thirrjen e kryetarit të tyre Mahir Jagxhilar për ta përkrahur Totajn e PDK-së më 19 nëntor, pasi thotë se ky i fundit gjatë fushatës elektorale të 22 tetorit përdori gjuhë përçarëse ndaj komunitetit turk.
“Partia Demokratike Turke e Kosovës (KDTP) e paska përkrahur Shaqir Totajn e PDK’së në garën e balotazhit për kyetar të Prizrenit. Ndërsa, jo më larg se gjatë fushatës zgjedhore të fundit, është sjellur me zë dëshmia ku Shaqir Totaj thoshte: ‘A mendoni se dikush…turqelia që s’di me fol shqip ka me ardhë me ta rregullu çështjen e ujit dhe të rrymës’, duke shpifur në drejtim të Mytaher Haskukës, por njëkohësisht duke përdorur gjuhë përçarëse e fashiste ndaj komunitetit turk. Uroj që komuniteti turk të jetë i vetëdijshëm se kryetari i KDTP’së, Mahir Yagcilar, është vetëm një dallaveraxhi që nuk i përfaqëson ata, edhe pse është pjesë e komunitetit të tyre. Ndaj, uroj po ashtu që thirrja e Yagcilarit për turqit që në Prizren ta mbështesin Totajn për kryetar, të mos dëgjohet e respektohet. Prizrenit i duhet një kryetar i cili promovon barazi dhe i cili punon për të gjithë qytetarët, pa dallim. E ai është Mytaher Haskuka”, ka shkruar Hoti në Facebook.
Akuzat e VV-së ndaj Totajt më 8 tetor dhe videoincizimi i publikuar…
Levizja Vetëvendosje, përmes një konference të jashtëzakonshme më 8 tetor publikoi një videoinicizim përmes të cilit akuzuan Totajn e PDK-së për fyerje të kandidatit të saj dhe përmes tij gjithë komunitetin turk.
Zëri që dëgjohet në këtë incizim sipas VV-së është i Totajt të PDK-së, i cili nga një tubim parazgjedhor në Has, dhe në një tubim në lagjen “Jeta e Re”, Haskukën e quan turqeli që nuk di të flasë shqip.
“A mendon se dikush tjetër, turqelia që s’din me fol shqip, ka me ardh me ta rregullu cashtjen e ujit e t’rrymës?”.
“Ka ardhë koha që duhet me menu, që qytetin e Prizrenit edhe Hasin mos me ia lonë në dorë njerëzve që s’dinë me folë shqip.”
VV në reagimin e tyre deklaruan se Totaj i PDK-së shpif për kandidatin e tyre në Prizren, Mytaher Haskuka, gjoja nuk është shqiptar.
Pos shpifjes, sipas tyre mesazh i tij shpërfaq një gjuhë të padëgjuar të urrejtjes, gjuhë përçarëse dhe fashiste.
“Këto incizime na kanë sjellë qyetarët tanë të cilët kanë qenë tejet të frustuar nga një gjuhë e tillë fashiste e përçarëse. Jo që kjo është e rendësishme në këtë garë, por për t’ua demantuar shpifjen, dua t’ju tregoj që Mytaher Haskuka për nga etnia është shqiptar. Shumica e qytetarëve të Komunës sonë i njohin shumë mirë, si kandidatin, ashtu edhe familjen Haskuka. Gjyshi i Mytaherit ka qenë ndër të burgosurit e parë politikë shqiptarë pas Luftës së Dytë Botërore. Ai ka vuajtur 4 vite burg, mes viteve 1945 e 1949, nga regjimi i Jugosllavisë për çështje kombëtare”, deklauan nga dega e VV-së në Prizren.
Më tej kjo parti deklaroi se “Prizreni njihet për një bashkëjetesë tradicionale, e Shaqir Totaj i PDK-së e cënon këtë, dhe shkon më tej duke i cënuar vlerat demokratike të këtij vendi, duke i përcmuar komunitetet, duke shpërndarë gjuhë të urrejtes, e duke u munduar të fitojë me një rajonalizëm mesjetar, e duke u munduar të instalojë fashizëm”.
Videoincizimi:
