Për presidentin Ilir Meta, rrugëtimi i Shqipërisë drejt BE-së nuk mund të jetë kurresesi një proces i vetëm dhe i shkëputur nga ai i vendeve të tjera të Ballkanit Perëndimor, ndaj ai thotë se nevojitet një koordinim i plotë institucional edhe në raport me politikat e zhvillimit. Komentet vijnë në edicionin e parë të Forumit Ekonomik të Tiranës që mban një emër simbolik “Ballkani i së ardhmes”.
I ftuar në këtë konferencë, Meta vuri në dukje edhe nevojën e stabilitetit politik të rajonit. Sipas tij, është e domosdoshme të shtohen përpjekjet për një zgjidhje sa më të shpejtë të problemit të Maqedonisë dhe Greqisë, që të jepet mundësia e integrimit të Maqedonisë në NATO. Po ashtu, kërkohet dhe normalizim i plotë i marrëdhënieve mes Kosovës e Serbisë.
Presidenti Meta kërkoi edhe projekte për treg të përbashkët rajonal. “Strategjia më e zgjuar dhe afatgjatë do të ishte krijimi i sinergjisë mes vendeve tona për të hartuar një platformë të unifikuar të investimeve strategjike ku i gjithë rajoni të shihet si një i vetëm për biznesin e koorporatave multinacionale apo për projektet madhore me impakt rajonal. Projekti TAP padyshim që është një histori suksesi për të gjithë vendet e përfshira në këtë projekt”, tha ai. /tesheshi.com/
