Ministri i Jashtëm grek, Nikos Dendias kundërshton me forcë çdo diskutim për ndryshimin e kufijve në Ballkan dhe u bëri thirrje të gjitha vendeve të kontinentit evropian që bashkërisht të kundërshtojnë ndikimet e jashtme destabilizuese, me sa duket duke aluduar për Rusinë.
Dendias bëri një vizitë zyrtare në Bosnje dhe pas një takimi me homologen Bisera Turkoviç u tha gazetarëve se Athina mbështet fuqimisht integritetin dhe sovranitetin e Bosnjes dhe perspektivën e saj evropiane, duke e konsideruar atë të rëndësishme për stabilitetin e të gjithë rajonit, vendet e të cilit duhet të bëhen gjithashtu anëtarë të BE-së.
“Greqia kundërshton çdo diskutim për ndryshimin e kufijve të rajonit”, tha kreu i dipomacisë greke.
Ai shtoi se beson se dialogu konstruktiv, së bashku me durimin, është ende mënyra më e mirë për të zgjidhur problemet e brendshme në Bosnje, duke përfshirë diskutimet mbi ndryshimet në kushtetutë dhe ligjin zgjedhor.
“Zgjidhjet duhet të vijnë gjithmonë nga vetë shteti, jo nga jashtë. Duhet të jemi të kujdesshëm sepse ka përpjekje nga palë të treta për të destabilizuar rajonin”, tha Dendias, duke u bërë thirrje të gjitha vendeve të Ballkanit që të luftojnë ndikimet negative të jashtme.
Kështu, me këto qëndrime, Athina zyrtare po “luan me një portë”, atë të BE-së, duke mos mbajtur anë serbe, aq më pak ruse. /tesheshi.com/
