PD e ka përjetuar me ngazëllim politik faktin që kreu i grupit të PS-së, Taulant Balla, e pranoi njohjen me biznesmenin e arrestuar në Greqi, Edmond Bego.
“Tre ditë pas arrestimit të trafikantit Edmond Bego, Taulant Balla u detyrua të pranojë që ka miqësi familjare me personin që është i dënuar në Itali me 21 vite burg dhe është shndërruar nga “Rilindja” në biznesmen ndërtimi”, tha nr.2 i PD-së, Edi Paloka. Por ky i fundit vijoi më tej:
“Balla nuk i është përgjigjur pyetjes se çfarë e lidh atë me trafikantin. Balla gënjeu kur tha se miqësia me Begon nuk i ka dhënë trafikantit mburojë politike”.
Pak orë më pas, Balla i komentoi kështu akuzat e opozitës ndaj tij:
“Lidhur me 100 akuzat e hedhura nga gojëtarë të ndryshëm të PD-së me rastin në fjalë, unë do i përgjigjem vetëm njërës që ka interes. A ka qenë ligji dhe sundimi i ligjit i njëjtë edhe për këtë person? Apo ka gëzuar mburojë politike? Dua t’ju them qartë për secilin prej nesh dhe për mua sundimi i ligjit duhet të jetë dhe është një. Personin në fjalë sigurisht që e njoh, njoh bashkëshorten e tij dhe fëmijë të shkëlqyer, nxënës shembullorë moshatarë me tim bir. Dua t’ju them me garanci të plotë se kurrë nuk i është ofruar një mburojë dhe përgjigjen e ka dhënë shteti shqiptar”, tha socialisti Taulant Balla. /tesheshi.com/
